گوگل نیوز پر ہمیں فالو کریںعیدالاضحیٰ قریب آتے ہی کراچی میں مویشی منڈیوں اور گھروں میں لائے گئے قربانی کے جانوروں کی حفاظت ایک بار پھر سوالیہ نشان بن گئی ہے کیونکہ شہر کے مختلف علاقوں میں چوری کی وارداتوں میں اضافہ دیکھنے میں آ رہا ہے۔ اسی سلسلے میں ایک افسوسناک واقعہ گلستان جوہر میں پیش آیا ہے جہاں سے 25 بکرے چوری کر لیے گئے۔
تفصیلات کے مطابق کراچی کے علاقے گلستان جوہر بلاک 8 میں نامعلوم افراد عید قرباں کے لیے فروخت کی غرض سے لائے گئے 25 بکرے چوری کر کے فرار ہو گئے۔ یہ واقعہ جمعے اور ہفتے کی درمیانی شب پیش آیا جب ملزمان پلاٹ پر بندھے ہوئے جانوروں کو کھول کر ساتھ لے گئے۔
🚨کراچی؛ عید قرباں پر فروخت کے لیے لائے گئے 25 بکرے چوری، فوٹیج بھی سامنے آگئی
عیدالاضحیٰ کے قریب آتے ہی شہر قائد میں قربانی کے لیے لائے جانے والے مویشیوں کے چوری کے واقعات ہونا شروع ہوگئے۔
ملیر کینٹ تھانے کے علاقے گلستان جوہر بلاک 8 میں نامعلوم چور 25 بکرے چوری کر کے لے گئے۔ pic.twitter.com/yv42hjbmex
— QOMINEWS (@QOMINEWS) May 10, 2026
اطلاعات کے مطابق چور موٹر سائیکل اور کار پر سوار تھے اور انہوں نے بکروں کو ایک سوزوکی گاڑی میں منتقل کیا جس کے بعد موقع سے فرار ہو گئے۔ اس واقعے کی باقاعدہ رپورٹ تھانہ ملیر کینٹ میں درج کر دی گئی ہے۔
بکروں کے مالک محمد اسامہ خان کے مطابق چوری ہونے والے جانوروں کی مجموعی مالیت 19 لاکھ روپے سے زائد ہے۔انکا کہنا ہے کہ یہ بکرے خاص طور پر عید الاضحیٰ کے موقع پر فروخت کے لیے لائے گئے تھے۔
واقعے کی سی سی ٹی وی فوٹیج بھی منظرِ عام پر آ گئی ہے جس میں مبینہ ملزمان کو جانور لے جاتے ہوئے دیکھا جا سکتا ہے۔ پولیس حکام کے مطابق فوٹیج اور دیگر ویڈیوز کی مدد سے ملزمان کی شناخت اور گرفتاری کے لیے کوششیں جاری ہیں۔
