گوگل نیوز پر ہمیں فالو کریںبالی وڈ کے کنگ شاہ رخ خان کو جان سے مارنے کی دھمکی موصول ہوئی ہے، جو بھارتی میڈیا کے مطابق سلمان خان کو دی گئی حالیہ دھمکیوں کے بعد سامنے آئی ہے۔
تازہ ترین رپورٹ کے مطابق ممبئی پولیس نے شاہ رخ خان کے خلاف دھمکی کی اطلاع ملنے کے بعد تحقیقات کا آغاز کر دیا ہے۔ شاہ رخ خان نے حال ہی میں اپنی 59ویں سالگرہ منائی اور تین دہائیوں پر مشتمل اپنے فلمی کیریئر میں وہ بالی وڈ کے سب سے پسندیدہ اور قابل ستائش ستاروں میں سے ایک ہیں۔
شاہ رخ خان کے مداحوں نے ان کی سالگرہ جوش و خروش سے منائی اور ان کی طویل عمر کے لیے نیک خواہشات کا اظہار کیا تاہم اس دھمکی کی خبر سے ان کے چاہنے والے غمگین ہیں۔ ممبئی کے باندرہ پولیس اسٹیشن نے اس معاملے کی تحقیقات شروع کر دی ہے۔
بھارتی میڈیا رپورٹس کے مطابق شاہ رخ خان کو فون کال کے ذریعے یہ دھمکی دی گئی۔ باندرہ پولیس اسٹیشن نے ان کی جانب سے کیس درج کر لیا ہے۔ نیوز 18 کی رپورٹ کے مطابق بھارتی ریاست چھتیس گڑھ کے رہائشی ایک شخص، جس کا نام فیضان بتایا جا رہا ہے، اس نے یہ کال کی تھی۔
تحقیقات کے دوران ایک پولیس ٹیم راجپور روانہ ہوئی ہے تاکہ مبینہ ملزم فیضان سے تفتیش کی جا سکے۔ پولیس حکام اس واقعے کے تمام پہلوؤں کا جائزہ لے رہے ہیں کیونکہ ممکن ہے کہ یہ کال صرف ایک مذاق ہو یا اس کا تعلق لارنس بشنوئی گینگ کے کسی رکن سے بھی ہو۔ ٹائمز ناؤ نے تصدیق کی ہے کہ یہ دھمکی براہ راست شاہ رخ خان کو فون پر دی گئی تھی۔
