گوگل نیوز پر ہمیں فالو کریںکراچی کے علاقے منظور کالونی میں پانی کے سنگین بحران نے ایک اور افسوسناک سانحہ جنم دیا جہاں ایک نوجوان لڑکا پانی کی ٹینکی بھرنے کی کوشش کے دوران چوتھی منزل سے گر کر شدید زخمی ہو گیا۔
واقعہ اس وقت پیش آیا جب علاقے میں کئی دنوں سے پانی کی فراہمی بند ہونے کے باعث مذکورہ لڑکے نے مجبوراً پانی کی ٹینکی ڈلوانے کا بندوبست کیا۔
چشم دید گواہوں کے مطابق نوجوان پانی کی ٹینکی سے پائپ جوڑ رہا تھا کہ توازن برقرار نہ رکھ سکا اور چوتھی منزل سے نیچے گر گیا۔ اہلِ محلہ نے فوری طور پر زخمی کو قریبی اسپتال منتقل کیا، جہاں اس کی حالت تشویشناک بتائی جا رہی ہے۔
یہ واقعہ شہر کراچی میں جاری پانی کے بحران کی سنگینی کو ایک بار پھر اجاگر کرتا ہے، جہاں بیشتر علاقوں میں شہری روزانہ کی بنیاد پر پانی کے لیے مارے مارے پھرتے ہیں۔
منظور کالونی سمیت شہر کے متعدد علاقوں میں مہینوں سے پانی کی ترسیل بند یا انتہائی محدود ہے، جس کی وجہ سے لوگ ٹینکرز، بورنگ یا خطرناک طریقوں سے پانی کے حصول پر مجبور ہو چکے ہیں۔
شہری حلقوں کا کہنا ہے کہ اگر شہر میں صاف پانی کی باقاعدہ فراہمی یقینی بنائی جاتی تو آج اس طرح کے حادثات رونما نہ ہوتے۔
علاقہ مکینوں نے حکومت سندھ، واٹر بورڈ اور شہری انتظامیہ سے مطالبہ کیا ہے کہ کراچی کے پانی کے بحران پر فوری توجہ دی جائے اور ایسے ناقابلِ تلافی حادثات سے بچاؤ کے لیے مؤثر اقدامات کیے جائیں۔
