پارٹی میں بغاوت، برطانوی وزیر اعظم اعتماد کا ووٹ لینے میں کامیاب

لندن: برطانوی وزیر اعظم بورس جانسن اپنی ہی پارٹی میں بغاوت کے بعد پارلیمنٹ سے اعتماد کا ووٹ لینے میں کامیاب ہوگئے ہیں جس کے بعد بورس جانسن کے وزارتِ عظمیٰ سے ہٹنے کے امکانات معدوم ہو گئے۔

تفصیلات کے مطابق بورس جانسن ہی برطانیہ کے وزیر اعظم رہیں گے۔ تحریکِ عدم اعتماد کے دوران وزیر اعظم کے حق میں 211 جبکہ مخالفت میں 148 ووٹ آئے۔ بورس جانسن کو کورونا وبا کے دوران پارٹی میں شرکت پر پارٹی میں مخالفت کا سامنا تھا۔

یہ بھی پڑھیں:

نبی کریم ﷺکی شان میں گستاخی، او آئی سی کی شدید مذمت

تحریکِ عدم اعتماد کی ناکامی کے بعد وزیر اعظم بورس جانسن نے اپنے خطاب میں کہا کہ پارلیمنٹ نے حتمی اور متاثر کن فیصلہ دیا ہے۔ جو نتیجہ آیا، وہ سیاست اور ملک کیلئے اچھا ہے۔ اب ہمیں بطور حکومت اور پارٹی متحد ہونے کی ضرورت ہے۔

خیال رہے کہ اس سے قبل پاکستان میں سابق وزیر اعظم عمران خان کے خلاف تحریکِ عدم اعتماد کامیاب ہوگئی تھی جو اپوزیشن کی جانب سے لائی گئی تاہم بورس جانسن کے خلاف ان کی پارٹی کی جانب سے ہی عدم اعتماد کی تحریک لائی گئی۔

برطانوی میڈیا نے پارٹی گیٹ اسکینڈل کے عنوان سے بورس جانسن کے متعلق خبریں شائع کیں۔ برطانیہ میں کورونا لاک ڈاؤن کے دوران وزیر اعظم بورس جانسن نے جون 2020 میں سرکاری رہائش گاہ پر انی سالگرہ 30 مہمانوں کے ساتھ منائی تھی۔