گوگل نیوز پر ہمیں فالو کریںہالی ووڈ کی معروف اداکارہ کیمیلا مینڈس نے اپنے نئی لائیو ایکشن فلم “ماسٹرز آف دی یونیورس” میں جنگجو کردار ٹیلا کا روپ دھار لیا ہے اور فلم بندی مکمل ہونے کے بعد اپنے انسٹاگرام پر پردے کے پیچھے کی تصاویر شیئر کی ہیں۔
ان تصاویر میں کیمیلا مینڈس کو جنگی لباس میں طاقتور پوز میں دیکھا جا سکتا ہے، جہاں وہ اپنی جسمانی صلاحیتوں کا مظاہرہ کر رہی ہیں۔ اداکارہ کا کہنا ہے کہ یہ کردار ان کے کیریئر کا سب سے زیادہ دلچسپ اور چیلنجنگ تجربہ رہا ہے۔
انہوں نے سات ماہ تک لندن میں فلم کی شوٹنگ کی اور کردار کی تیاری کے لیے کسی ایتھلیٹ کی طرح سخت تربیت حاصل کی۔ کیمیلا نے نہ صرف اپنی جسمانی ساخت میں زبردست تبدیلی لائی بلکہ اپنے بال بھی سرخ رنگے تاکہ ٹیلا کے کردار کی ظاہری جھلک کو مکمل طور پر اپنا سکیں۔
اداکارہ نے فلم کے سیٹ سے شیئر کی گئی تصاویر کے ساتھ مداحوں کو یقین دہانی کروائی کہ یہ ایک شاندار پراجیکٹ ہے جس کا وہ بے چینی سے انتظار کر رہی ہیں اور وہ اس کا حصہ بننے پر بے حد خوش ہیں۔
یہ فلم ایمیزون ایم جی ایم اسٹوڈیوز کے تحت تیار کی جا رہی ہے، جس میں نکولس گالٹزین کو پرنس ایڈم/ہی مین کے مرکزی کردار میں پیش کیا جائے گا۔ دیگر اہم اداکاروں میں ادریس ایلبا، ایلیسن بری، مورینا بکارین اور جیریڈ لیٹو شامل ہیں۔
کیمیلا مینڈس نے اس فلم میں ٹیلا کا کردار نبھایا ہے، جو ہی مین سیریز کی ایک مقبول اور بہادر خاتون جنگجو ہے۔ اس کردار میں وہ فلم کی توجہ کا مرکز بنی ہیں۔
اس سے قبل نکولس گالٹزین نے بھی فلم کے سیٹ سے پہلی جھلک شیئر کی تھی جس میں وہ مشہور “سورڈ آف پاور” کے ساتھ دکھائی دیے، جو کردار ہی مین کی علامت سمجھا جاتا ہے۔ ان کا کہنا ہے کہ پرنس ایڈم کا کردار ان کے لیے ایک خواب کی مانند ہے۔
یہ فلم ایک نئی لائیو ایکشن پیشکش ہے جس سے شائقین کو کلاسک “ماسٹرز آف دی یونیورس” کا جدید مگر شاندار روپ دیکھنے کو ملے گا۔
