گوگل نیوز پر ہمیں فالو کریںلندن میں پیش آنے والے ہراسانی کے واقعے کے بعد پاکستان علماء کونسل کے چیئرمین حافظ طاہر اشرفی کا موقف بھی سامنے آ گیا۔
انہوں نے اپنے ویڈیو بیان میں کہا کہ وہ اپنی فیملی کے ساتھ لندن میں ایک دوست کی دعوت پر جا رہے تھے کہ اس دوران پی ٹی آئی اور کچھ دیگر فتنہ پرور افراد نے انہیں اور ان کی فیملی کو روکا اور بدتمیزی کی۔ ان کے بقول ان افراد نے پاک فوج کے خلاف بات کی، جس پر انہوں نے کہا کہ آج پوری دنیا ہمارے سپہ سالار کے گیت گا رہی ہے، اس لیے یہ رویہ مناسب نہیں۔ انہوں نے سوال اٹھایا کہ اگر کل کسی کی بہن یا بیٹی کے ساتھ ایسا ہو تو کیا وہ اسے برداشت کر پائیں گے؟
طاہر اشرفی نے مزید کہا کہ وہ عمران خان کے پاس خود نہیں گئے تھے کہ انہیں اپنا اسپیشل نمائندہ بنایا جائے بلکہ عمران خان ان کے پاس آئے تھے۔ انہوں نے دعویٰ کیا کہ تین افراد نے ان سے اس حوالے سے درخواست کی تھی اور وہ آج بھی زندہ ہیں، جن سے اس بات کی تصدیق کی جا سکتی ہے۔ ان کا کہنا تھا کہ انہوں نے کبھی اپنے یا اپنی فیملی کے لیے ایک روپے کا فائدہ نہیں اٹھایا۔
اپنے بیان میں انہوں نے بتایا کہ انہیں روکنے والے افراد نے ہراسانی کی کوشش کی اور بار بار یہی سوال کیا کہ وہ فوج اور سپہ سالار کی حمایت کیوں کرتے ہیں۔ انہوں نے جواب دیا کہ وہ ایک عظیم جرنیل ہیں جنہیں دنیا بھر میں سراہا جا رہا ہے اور دعائیں دی جا رہی ہیں۔ انہوں نے کہا کہ وہ اپنی فیملی کے ساتھ تھے اور موقع پر تحریک انصاف کے ذمہ داران بھی موجود تھے، جنہیں اس صورتحال پر غور کرنا چاہیے تھا۔
