گوگل نیوز پر ہمیں فالو کریںآج کل پاکستان کی فری لانسنگ انڈسٹری ایک بڑے بحران سے گزر رہی ہے، جہاں ہزاروں نوجوانوں کے آن لائن اکاؤنٹس پر “زیرو آرڈرز” معمول بنتے جا رہے ہیں۔ ایک تحقیقاتی جائزے کے مطابق 100 سے زائد ٹاپ ریٹڈ اور لیول ٹو پاکستانی فری لانسرز سے گفتگو میں 85 فیصد افراد نے بتایا کہ گزشتہ 6 ماہ کے دوران ان کی آمدنی یا تو نصف رہ گئی یا مکمل طور پر ختم ہو گئی۔
دی پنچ کی ایک رپورٹ کے مطابق کووڈ کے دنوں میں پاکستان میں فری لانسنگ کا غیر معمولی بوم آیا تھا۔ پے اونیئر کی عالمی رپورٹ نے پاکستان کو دنیا کی چوتھی تیزی سے ابھرتی ہوئی فری لانس مارکیٹ قرار دیا، جبکہ اسٹیٹ بینک کے مطابق مالی سال 2021-22 میں پاکستانی فری لانسرز 397 ملین ڈالرز ملک میں لائے۔ تاہم تحقیقات سے معلوم ہوا کہ اس مارکیٹ کا تقریباً 80 فیصد حصہ بنیادی نوعیت کے کاموں، جیسے ڈیٹا انٹری، بیک گراؤنڈ ریموو اور کاپی پیسٹ رائٹنگ پر مشتمل تھا۔
نومبر 2022 میں چیٹ جی پی ٹی کے آنے کے بعد صورتحال تیزی سے بدل گئی۔ ہارورڈ بزنس اسکول اور واشنگٹن یونیورسٹی کی تحقیق کے مطابق فری لانس پلیٹ فارمز پر رائٹنگ اور بنیادی کوڈنگ جابز میں 21 فیصد کمی ریکارڈ کی گئی، جبکہ 2026 تک بنیادی گرافک ڈیزائننگ اور کاپی رائٹنگ مارکیٹ میں یہ گراوٹ 40 سے 50 فیصد تک پہنچ چکی ہے۔
دوسری جانب 2024 اور 2025 میں انٹرنیٹ بندش، وی پی این بلاکنگ اور غیر مستحکم ڈیجیٹل ماحول نے بھی پاکستانی آئی ٹی انڈسٹری کو شدید نقصان پہنچایا۔ پاکستان سافٹ ویئر ہاؤسز ایسوسی ایشن کے مطابق ان پابندیوں سے شعبے کو 300 ملین ڈالر کا نقصان ہوا، جبکہ بیورو آف امیگریشن کے ریکارڈ کے مطابق صرف 2024 میں 8.5 لاکھ سے زائد پاکستانی ملک چھوڑ گئے، جن میں ہزاروں آئی ٹی پروفیشنلز بھی شامل تھے۔
رپورٹ میں سرکاری تربیتی پروگرامز پر بھی سوالات اٹھائے گئے ہیں۔ ڈیجی اسکلز جیسے منصوبوں پر الزام ہے کہ وہ اب بھی پرانے نصاب اور ایسی مہارتیں سکھا رہے ہیں جنہیں اے آئی بڑی حد تک غیر مؤثر بنا چکی ہے۔ ماہرین کے مطابق اب صرف اسکل نہیں بلکہ “اے آئی آٹومیشن”، “پرومپٹ انجینئرنگ” اور مکمل ڈیجیٹل سلوشنز فروخت کرنے کا دور ہے۔ ان کے مطابق فری لانسنگ ختم نہیں ہوئی بلکہ اس کی شکل بدل چکی ہے، اور جو نوجوان خود کو اے آئی کے مطابق اپ گریڈ کریں گے وہی مستقبل میں کامیاب ہوں گے۔
