گوگل نیوز پر ہمیں فالو کریںکراچی کے علاقے اورنگی ٹاؤن رحمت چوک میں ایک معصوم بچہ پیپلز پارٹی کے مقامی یو سی چیئرمین کے دفتر کے سامنے کھلے مین ہول میں جا گرا جس کی ویڈیو سی سی ٹی وی میں محفوظ ہو گئی اور علاقے میں خوف و ہراس پھیل گیا۔ خوش قسمتی سے بچے کو فوری طور پر محفوظ نکال لیا گیا اور کوئی بڑا حادثہ ہونے سے بچ گیا۔
ویڈیو میں دیکھا جا سکتا ہے کہ کھیلتے ہوئے بچہ اچانک مین ہول میں گر گیا مگر اس نے ہمت نہیں ہاری اور فوری طور پر شور مچایا۔ اس کے ساتھی بچے نے فوری ردعمل دکھایا اور اسے مین ہول سے باہر نکالنے میں مدد کی۔ شور سن کر علاقے کے مکین بھی فوراً موقع پر پہنچے اور بچے کی جان بچنے پر راحت کا سانس لیا۔
اورنگی ٹاؤن
رحمت چوک
بال بال بچت ہوگئی
گلیوں میں کھلے جابجا گٹر موت کے کھلے منہ ہیں
برائے مہربانی ان کا علاج فرمائیں pic.twitter.com/BDtlfnpXwn— RahilaMujahid (@RahilaMujahid) February 21, 2026
مقامی شہریوں کا کہنا ہے کہ یہ مین ہول پیپلز پارٹی کے یو سی چیئرمین کے دفتر کے بالکل سامنے موجود ہے اور رحمت چوک سے علی گڑھ تک کھلے نالوں اور مین ہولز کی ابتر صورتحال برقرار ہے جو کسی بھی بڑے حادثے کا سبب بن سکتے ہیں۔
علاقہ مکینوں نے شکایت کی کہ گزشتہ ڈیڑھ سال سے مرمت کے لیے متعدد درخواستیں دی گئی ہیں لیکن انتظامیہ کی جانب سے کوئی عملی اقدام نہیں کیا گیا۔ جب یو سی چیئرمین سے رابطہ کیا جاتا ہے تو وہ کہتے ہیں کہ درخواستیں میئر کراچی کو بھیج دی گئی ہیں۔
مقامی شہریوں نے میئر کراچی اور اعلیٰ حکام سے مطالبہ کیا ہے کہ اس خطرناک کھلے مین ہول اور غفلت کا فوری نوٹس لیا جائے اور مرمت کے اقدامات جلد مکمل کیے جائیں تاکہ مستقبل میں کسی بچے یا شہری کو جان کا نقصان نہ پہنچے۔
