گوگل نیوز پر ہمیں فالو کریںوزیرِاعلیٰ پنجاب مریم نواز نے رائیونڈ تبلیغی اجتماع میں شرکت کرنے والوں کی سہولت کے لیے تین دن تک الیکٹرک بسیں چلانے کا اعلان کیا ہے اور رائیونڈ جانے والے راستوں پر فوری پیچ ورک (مرمت) کرنے کی ہدایت کی ہے۔
یہ الیکٹرک بسیں ریلوے اسٹیشن اور ایئرپورٹ سے رائیونڈ تک چلائی جائیں گی تاکہ اجتماع میں آنے والوں کو آسان اور آرام دہ سفری سہولت فراہم کی جا سکے۔
یہ اعلان مریم نواز اور مرکز تبلیغی جماعت کی شوریٰ کے ارکان جن میں ڈاکٹر ندیم اشرف، مولانا امجد فاروق، مولانا محمد عامر، امتیاز احمد غنی اور ارشد شامل تھے کے درمیان ملاقات کے دوران کیا گیا۔
ملاقات کے دوران وزیرِاعلیٰ نے متعلقہ حکام کو ہدایت کی کہ اجتماع کے لیے تمام ضروری سہولیات اور اعلیٰ معیار کی تیاریوں کو یقینی بنایا جائے۔ انہوں نے ڈپٹی کمشنر، سی سی پی او، ڈی آئی جی اور سی ٹی او کو ہدایت کی کہ وہ ذاتی طور پر رائیونڈ جائیں اور انتظامات کا جائزہ لیں۔
تبلیغی جماعت کے وفد نے مریم نواز کی عوامی خدمت کے جذبے کو سراہا اور ان کی مزید کامیابی کے لیے خصوصی دعا کی۔
وزیرِاعلیٰ نے رائیونڈ کی تین اہم سڑکوں کی فوری مرمت و بحالی کے احکامات بھی دیے اور یکم نومبر سے اجتماع کے اختتام تک خصوصی صفائی مہم کے آغاز کا اعلان کیا۔ انہوں نے انتظامیہ کو ہدایت کی کہ علاقے میں گلاب کے عرق سے خوشبو کا چھڑکاؤ بھی کیا جائے۔
تبلیغی جماعت کے بزرگوں نے الیکٹرک بس سروس کے آغاز اور چند ماہ میں 90 ہزار گھروں کی تعمیر پر حکومت کو سراہا۔ انہوں نے شہروں اور دیہاتوں میں صفائی کے اقدامات کی تعریف کرتے ہوئے کہا کہ حکومت نے سیلاب متاثرین کی مدد میں خود انحصاری کا مظاہرہ کیا ہے۔
