گوگل نیوز پر ہمیں فالو کریںلاہور الیکٹرک سپلائی کمپنی (لیسکو) نے 682 ملین روپے سے زائد واجب الادا بلز کی عدم ادائیگی پر بحریہ ٹاؤن لاہور کے چار بڑے پروجیکٹس کی بجلی منقطع کر دی۔
لیسکو کے سی ای او محمد رمضان بٹ نے تصدیق کی کہ بحریہ ٹاؤن، بحریہ آرچرڈ، بحریہ ایجوکیشن سٹی اور کنگ ریٹ ایسوسی ایٹس کا ایک پروجیکٹ ادائیگی میں ناکام رہا ہے۔
انہوں نے کہا کہ بلز کی ادائیگی تک بجلی کی فراہمی بحال نہیں کی جائے گی۔ انہوں نے مزید بتایا کہ ادائیگی کے لیے متعدد بار مہلت دی گئی تھی، لیکن وہ سب ختم ہو چکی ہیں۔
لیسکو کے ریکارڈ کے مطابق بحریہ ٹاؤن پر 530 ملین روپے واجب الادا ہیں، بحریہ آرچرڈ پر 137 ملین روپے، بحریہ ایجوکیشن سٹی پر 5اعشاریہ 465 ملین روپے اور کنگ ریٹ پروجیکٹ پر 2اعشاریہ 7 ملین روپے واجب الادا ہیں۔ آخری ادائیگی کی آخری تاریخ 27 نومبر مقرر کی گئی تھی تاہم ڈیولپر نے عدالت کا رخ کیا۔
بجلی منقطع ہونے کے بعد رہائشیوں میں شدید غصہ پایا گیا اور وہ بحریہ ٹاؤن دفاتر کے باہر مظاہرہ کرنے کا ارادہ رکھتے ہیں۔ کئی رہائشیوں نے بتایا کہ کھانے خراب ہو گئے اور روزمرہ کے معمولات متاثر ہوئے۔
یہ پہلا موقع نہیں جب بحریہ ٹاؤن میں بجلی کے مسائل پیش آئے ہیں۔ 2024 میں بھی لیسکو نے 762 ملین روپے کے واجب الادا بلز کی عدم ادائیگی کے باعث بجلی منقطع کی تھی۔
ڈیولپر پر اسلام آباد کے پروجیکٹس میں اوور بلنگ اور سولر پاور کٹوتیوں کے حوالے سے بھی شکایات موصول ہو چکی ہیں۔لیسکو نے اعلان کیا ہے کہ واجب الادا بلز کی ادائیگی کے بعد فوری طور پر بجلی کی فراہمی بحال کر دی جائے گی۔
