گوگل نیوز پر ہمیں فالو کریںمشہور سیریز اسٹرینجر تھنگز کے پانچویں اور آخری سیزن کی پریمیئر کے دوران 27 نومبر 2025 کو نیٹ فلکس کی سروس دنیا کے کئی حصوں میں عارضی طور پر بند ہو گئی۔ شائقین نے ایک ساتھ اسٹریمنگ شروع کی تو سرورز پر غیر معمولی بوجھ پڑ گیا جس کی وجہ سے سروس میں خلل آیا اور صارفین شدید مایوس ہوئے۔
نیٹ فلیکس کی آفیشل رپورٹ کے مطابق پریمیئر کے پہلے گھنٹے میں 25 ملین سے زیادہ صارفین نے لاگ ان کرنے کی کوشش کی جو پلیٹ فارم کی تاریخ میں سب سے زیادہ ٹریفک میں سے ایک تھی۔ امریکہ، یورپ، ایشیا اور جنوبی امریکہ سمیت کئی علاقوں میں صارفین کو کچھ غلط ہو گیا کا پیغام ملا، اور ویڈیوز لوڈ نہیں ہو سکیں۔
نیٹ فلیکس کے ترجمان نے کہاکہ ہمارے شائقین کا جوش دیکھ کر خوشی ہوئی لیکن غیر متوقع ٹریفک کی وجہ سے عارضی رکاوٹ پیدا ہوئی۔ ہماری ٹیم نے فوری کارروائی کی اور 45 منٹ کے اندر سروس بحال کر دی گئی۔
سوشل میڈیا پر شائقین نے مایوسی اور غصے کا اظہار کیا۔ ٹوئٹر (اب ایکس) پر #NetflixDown ٹرینڈ بن گیا اور صارفین نے مذاق کرتے ہوئے لکھا کہ اسٹرینجر تھنگز کا آخری سیزن دیکھنے سے پہلے ہی اپسائیڈ ڈاؤن میں پہنچ گئے جبکہ ایک صارف نے کہاکہ پریمیئر کا انتظار تھا مگر نیٹ فلکس نے سب کو ڈیموگورگن کی طرح نگل لیا۔
یہ پہلا موقع نہیں جب نیٹ فلیکس کو ایسے مسائل کا سامنا کرنا پڑا۔ ماضی میں برڈ باکس اور دی Witcher جیسی ہٹ سیریزز کے دوران بھی سرورز اوورلوڈ ہو چکے تھے مگر اسٹرینجر تھنگز کی غیر معمولی مقبولیت کی وجہ سے یہ رکاوٹ سب سے بڑی تھی۔ کمپنی نے وعدہ کیا ہے کہ مستقبل میں ایسے واقعات سے بچنے کے لیے سرور کی گنجائش بڑھائی جائے گی۔
اب شائقین آخری سیزن دیکھنے میں مصروف ہیں جو 1980 کی دہائی کے نوستالجیا، سائنس فکشن اور ہارر کا امتزاج پیش کرتا ہے۔ نیٹ فلیکس کا کہنا ہے کہ یہ سیزن اسٹرینجر تھنگز کی کہانی کا شاندار اختتام ثابت ہوگا۔
