وزیر اعظم کیخلاف مبینہ جھوٹی خبر، جنرل امجد شعیب کو دوسرا نوٹس بھیجنے کا فیصلہ

اسلام آباد: وفاقی تحقیقاتی ادارے (ایف آئی اے) نے دفاعی تجزیہ کار لیفٹیننٹ جنرل (ر) امجد شعیب کو وزیر اعظم کیخلاف مبینہ طور پر جھوٹی خبر پھیلانے پر دوسری بار نوٹس جاری کرنے کا فیصلہ کیا ہے۔

تفصیلات کے مطابق ایف آئی اے نے کچھ روز قبل دفاعی تجزیہ کار لیفٹیننٹ جنرل (ر) امجد شعیب کو 7 ستمبر کے روز تفتیش کیلئے طلب کیا تاہم دوسرا نوٹس بھیجنے کا فیصلہ ملزم کے سائبر کرائم ونگ کے سامنے پیش نہ ہونے کے باعث کیا گیا۔

یہ بھی پڑھیں:

ملک دشمن کارروائیوں میں ملوث 2 دہشت گرد سکھر سے گرفتار

وفاقی تحقیقاتی ادارے (ایف آئی اے) کا کہنا ہے کہ لیفٹیننٹ جنرل (ر) امجد شعیب نے یو ٹیوب پر وزیر اعظم شہباز شریف کے خلاف بے بنیاد الزامات لگائے جس کی وجہ سے ان کے خلاف تفتیش شروع کی گئی۔

ایف آئی اے کا اپنے حالیہ بیان میں کہنا تھا کہ لیفٹیننٹ جنرل (ر) امجد شعیب نے قطر میں وزیر اعظم کی اسرائیلی حکام سے ملاقات کا جھوٹا الزام عائد کیا، بے بنیاد تبصرے میں لوگوں کو ریاست کے خلاف اُکسایا گیا۔

تحقیقاتی ادارے (ایف آئی اے) کے بیان پر ردِ عمل دیتے ہوئے گزشتہ روز لیفٹیننٹ جنرل (ر) امجد شعیب کا کہنا تھا کہ یو ٹیوب پر پروگرام کرتا ہوں، مجھے کوئی نوٹس موصول نہیں ہوا۔