گوگل نیوز پر ہمیں فالو کریںممبئی: پاکستان سے بہتر مستقبل کی امید لیے بھارت منتقل ہونے والے ہندو میاں بیوی کو ممبئی میں بے دردی سے قتل کر دیا گیا جس سے دونوں ممالک کے درمیان پہلے سے کشیدہ تعلقات میں مزید تناؤ کا خدشہ ہے۔
مقتولہ کے والد نے بتایا کہ ان کی بیٹی سپنا اور داماد سنجے بہتر زندگی کے لیے بھارت گئے تھے مگر چند ہی ماہ بعد ان کی لاشیں ممبئی میں ان کے گھر سے برآمد ہوئیں۔ ممبئی پولیس نے مقتولہ کے والد کو فون پر اطلاع دی کہ ان کی بیٹی اور داماد کو چاقو کے وار سے قتل کیا گیا ہے۔
پولیس کے مطابق جوڑے کے دو بیٹے اس وقت پولیس کی تحویل میں ہیں جن سے تفتیش جاری ہے۔ سنجے کے والد کا کہنا ہے کہ ان کے بیٹے کا ممبئی میں خشک میوہ جات کا کاروبار اچھا کامیاب چل رہا تھا جبکہ بھارتی پولیس اس قتل کے مختلف محرکات پر غور کر رہی ہے۔
ہندو پنچایت کے سربراہ ایشور لال نے خدشہ ظاہر کیا ہے کہ بھارتی حکومت اس قتل میں انصاف کی فراہمی میں تاخیر کر سکتی ہے۔ ان کا مطالبہ ہے کہ مقتولین کی لاشیں پاکستان منتقل کی جائیں تاکہ ان کی آخری رسومات اپنے وطن میں ادا کی جا سکیں۔
یہ واقعہ ایسے وقت پیش آیا ہے جب بھارت اور پاکستان کے درمیان تعلقات پہلے ہی شدید تناؤ کا شکار ہیں۔ مئی کے آغاز میں پہلگام واقعے کو جواز بنا کر بھارت نے پاکستان پر حملہ کیا جس کے جواب میں پاک فوج نے بھرپور ردعمل دیا۔
بھارت کے نام نہاد “آپریشن سندور” کے جواب میں پاک فوج نے “آپریشن بنیان مرصوص” شروع کیا جس کے نتیجے میں بھارتی افواج کو بھاری جانی و مالی نقصان اٹھانا پڑا۔
