مقبوضہ جموں و کشمیر میں بنیادی ڈھانچے کی تعمیر، بھارت اور دبئی میں معاہدہ طے پا گیا

سری نگر : بھارتی وزیر اعطم نریندر مودی کی حکومت نے اس بات کا اعلان کیا ہے کہ اس نے مقبوضہ جموں و کشمیر میں انفراسٹرکچر کی تعمیر کےلیے دبئی کے ساتھ معاہدے پر دستخط کیے ہیں۔

دبئی معاہدے کے تحت مقبوضہ کشمیرمیں صنعتی پارکوں، آئی ٹی ٹاورز اور میڈیکل کالجز سمیت بنیادی ڈھانچے کی تعمیر میں مالی معاونت کرے گا۔

امریکی جریدے رائٹرز کی رپورٹ کے مطابق معاہدہ کتنے میں طے ہوا ہے اس حوالے سے کوئی اعدادوشمار نہیں دیے گئے ہیں۔ متحدہ عرب امارات میں شامل دبئی کی جانب سے بھارت کے5 اگست 2019ء کو دستور ہند کی دفعہ 370 کو ختم کرنے اورریاست جموں وکشمیرکو دو یونین علاقوں میں تقسیم کرنے کے اقدام کے بعد اس متنازع اور حساس علاقے میں سرمایہ کاری کا یہ پہلا غیرملکی سمجھوتا ہے۔

یہ بھی پڑھیں 

افغانستان سے متعلق ماسکو میں ٹرائیکا پلس کا اجلاس آج ہوگا

ایف اے ٹی ایف کا تین روزہ اجلاس کل سے پیرس میں شروع ہوگا

بھارت کے مرکزی وزیراور حکمران بھارتیہ جنتا پارٹی کے لیڈر پیوش گویل نے ایک بیان میں کہا ہے کہ ’’ریاست جموں و کشمیرجس رفتار سے ترقی کا سفر طے کررہی ہے، دنیا نے اب اس کو تسلیم کرنا شروع کردیا ہے۔ انہوں نے دعویٰ کیا ہے کہ دبئی کے مختلف اداروں نے جموں و کشمیرمیں سرمایہ کاری میں گہری دلچسپی ظاہرکی ہے۔

واضح رہے کہ 5 اگست کے اقدام کے بعد سے کسی اور ملک یا ریاست نے اس متنازع علاقے میں کسی منصوبے میں سرمایہ کاری کرنے ہامی نہیں بھری ہے۔ سیکورٹی فورسز کے آپریشن کی وجہ سے مقبوضہ علاقے میں بڑھے پیمانے میں ہلاکتیں ہو چکی ہیں۔

پیر کے روز بھارتی حکام نے کشمیر میں ہزاروں تارکین وطن مزدوروں کو محفوظ مقامات پر منتقل کیا تھا جو کہ ٹارگٹ کلنگ کے خوف سے وادی سے فرار ہو گئے تھے۔