گوگل نیوز پر ہمیں فالو کریںسیاسی منظرنامے میں ایک بار پھر سرگرمیوں کی گونج سنائی دینے لگی ہے جہاں جماعتیں اپنی عوامی طاقت کے اظہار کے لیے بڑے اجتماعات کی طرف بڑھ رہی ہیں۔ اسی سلسلے میں پاکستان تحریک انصاف نے لاہور کے تاریخی مقام پر ایک بڑے جلسے کا اعلان کرکے سیاسی درجہ حرارت مزید بڑھا دیا ہے۔
پاکستان تحریک انصاف نے 2 مئی کو مینارِ پاکستان پر جلسے کا اعلان کرتے ہوئے اس کے انعقاد کی اجازت حاصل کرنے کے لیے باضابطہ درخواست جمع کروا دی ہے۔
تفصیلات کے مطابق پاکستان تحریک انصاف نے ایک بار پھر سیاسی قوت کے اظہار کیلئے صوبائی دارالحکومت کا رخ کرنے کا فیصلہ کیا ہے۔ پی ٹی آئی نے واضح کیا ہے کہ 2 مئی کو مینارِ پاکستان پر جلسہ عام منعقد کیا جائے گا اور اس سلسلے میں تمام ضروری کارروائی مکمل کر لی گئی ہے۔
پی ٹی آئی لاہور کے صدر میاں اکرم عثمان کی جانب سے جلسے کے انعقاد اور سیکیورٹی انتظامات سے متعلق ڈپٹی سیکریٹری (ڈی سی) لاہور کو باقاعدہ درخواست جمع کروائی گئی ہے۔
درخواست میں موقف اختیار کیا گیا ہے کہ 2 مئی کو مینارِ پاکستان (گریٹر اقبال پارک) میں جلسے کی اجازت دی جائے تاکہ پارٹی اپنی سیاسی سرگرمیوں کا تسلسل برقرار رکھ سکے۔
پارٹی ذرائع کے مطابق وزیراعلیٰ خیبرپختونخوا سہیل آفریدی اس جلسے سے خطاب کریں گے۔
