ڈبلیو ڈبلیو ای کے مشہور ریسلر سمندر میں ڈوب کر ہلاک ہوگئے

نیو یارک:سابق ورلڈ ریسلنگ انٹرٹینمٹ (ڈبلیو ڈبلیو ای)کے اسٹار شیڈ گیسپرڈ لاس اینجلس کے ایک سمندر میں ڈوب کر اپنی جان کی بازی ہار گئے۔

بین الاقوامی خبر رساں ادارے کے مطابق پولیس نے بتایا کہ ساحل پر موجود ایک شخص نے گشت کرنے والے افسران کو لاش کے ساحل پر آنے کی اطلاع دی۔اس کے پولیس ایکشن میں آئی،پولیس نے لاش کی شناخت شیڈ گیسپرڈ کے نام سے کی اور پھر ان کے خاندان کو بھی مطلع کیا گیا۔

معروف ریسلر شیڈ گیسپرڈ گزشتہ اتوار کو اپنے 10 سالہ بیٹے آریہ کے ساتھ تیراکی کرنے کے لیے ساحل پر گئے تھے جس دوران وہ سمندر میں ڈوب گئے جب کہ ان کے 10 سالہ بیٹے کو ریسکیو حکام نے باحفاظت نکال لیا۔مگر شیڈ گیسپرڈ جانبر نہ ہوسکے۔

پولیس کے مطابق شیڈ گیسپرڈ جب ساحل سے 50 گز کے فاصلے پر تھے تب انہیں آخری مرتبہ ایک ریسکیو اہلکار نے دیکھا تھا اور بعد ازاں وہ ڈوب گئے تھے۔انہیں بچانے کی کوشش کی گئی مگر کامیابی حاصل نہ ہوسکی۔

شیڈ گیسپرڈ کی ہلاکت پر ان کی اہلیہ کی جانب سے ایک بیان جاری کیا گیا ہے جس میں انہوں نے ریسکیو حکام کا بیٹے کو بچانے اور شوہر کی لاش ڈھونڈنے پر شکریہ ادا کیا اور انہیں خراج تحسین پیش کیا ہے۔