شہباز شریف اور جہانگیر ترین کے کیسز کی تفتیش کرنیوالے ایف آئی اے افسران تبدیل

اسلام آباد :پاکستان تحریک انصاف کے رہنما جہانگیر ترین اور پاکستان مسلم لیگ (ن) کے صدر شہباز شریف کے کیسز کی تحقیقات کرنے والے وفاقی تحقیقاتی ادارے (ایف آئی اے) کے افسران کے تبادلے کر دیے گئے۔

مبینہ منی لانڈرنگ اور شوگر اسکینڈل کی تحقیقات کرنے والے ایف آئی اے کے افسران کے تبادلے کر دیے گئے۔ ان میں جہانگیر ترین اور شہباز شریف کے کیسز کے تفتیشی افسران بھی شامل ہیں۔

ایف آئی اے نے 9 اسسٹنٹ ڈائریکٹرز کو تبدیل کر دیا جن کی خدمات ایڈیشنل ڈائریکٹر جنرل ساؤتھ کراچی کو منتقل کر دی گئیں۔

ادھر ایف آئی اے لاہور میں اہم مقدمات کی تفتیش کے انچارج تین اسسٹنٹ ڈائریکٹرز بھی تبدیل ہونے والوں میں شامل ہیں۔

مزید پڑھیں:تازہ میڈیکل رپورٹ، ڈاکٹرز نے نواز شریف کو فضائی سفر سے روک دیا

اسسٹنٹ ڈائریکٹر سید علی مردان شہباز شریف کیس کے تفتیشی افسر ہیں، اسسٹنٹ ڈائریکٹر سید علی مردان بھی سابق ڈی جی بشیر میمن کے تفتیشی کیس میں جی آئی ٹی کا حصہ ہیں۔

اسسٹنٹ ڈائریکٹر عمیر ارشاد اور رانا فیصل بھی اہم تفتیشی مقدمات میں شامل ہیں۔

جن اسسٹنٹ ڈائریکٹرز کا تبادلہ کیا گیا ان میں عبدالقیوم، زوار احمد، شیراز عمر، ندیم احمد اور صبغت اللہ خان شامل ہیں۔