گوگل نیوز پر ہمیں فالو کریںسابق امریکی صدر جمی کارٹر 100 برس کی عمر میں انتقال کرگئے، کارٹر سینٹر کے مطابق وہ جارجیا کے اپنے گھر میں اپنے خاندان کے درمیان پرسکون طور پر دنیا سے رخصت ہوئے۔
کارٹر جو 1977 سے 1981 تک امریکہ کے صدر رہے، ایک دیہی علاقے میں معمولی پس منظر سے اٹھ کر عالمی سیاست کے مرکز تک پہنچے۔ صدر بننے سے قبل وہ جارجیا کے گورنر اور ایک کسان تھے۔
جمی کارٹر نے اپنے چار سالہ دورِ صدارت میں انسانی حقوق اور سماجی انصاف پر زور دیا اور اسرائیل و مصر کے درمیان کیمپ ڈیوڈ معاہدہ کروانے میں اہم کردار ادا کیا۔ تاہم ایران میں امریکی یرغمالیوں کے بحران اور تیل کے بحران جیسے مسائل کے باعث ان کی حکومت کو تنقید کا سامنا رہا۔ 1980 میں وہ ریپبلکن امیدوار رونالڈ ریگن سے انتخابات میں ہار گئے۔
پہاڑ دھواں بن کر اڑ گیا، کیا اسرائیل نے شام پر ایٹمی حملہ کردیا ہے؟
کارٹر کا بعد از صدارت دور بے حد فعال رہا۔ انہوں نے 1982 میں کارٹر سینٹر کی بنیاد رکھی اور عالمی سطح پر امن اور سماجی انصاف کے فروغ کے لیے کام کیا، جس کے اعتراف میں انہیں 2002 میں نوبیل امن انعام سے نوازا گیا۔
کارٹر اپنے آخری دنوں تک سماجی خدمات میں مصروف رہے۔ انہیں انصاف، محبت، اور خدمت کے اصولوں پر کاربند رہنے والے ایک انسان دوست رہنما کے طور پر یاد کیا جاتا ہے۔ وہ اپنی اہلیہ روزیلین، جن کے ساتھ انہوں نے 77 سال گزارے، کے انتقال کے ایک سال بعد دنیا سے رخصت ہوئے۔
