گڈاپ پولیس کاڈانس پارٹی پر چھاپہ، 19 افرادگرفتار،فارم ہاؤس سیل

کراچی :گڈاپ ٹاؤن پولیس نے کارروائی کرتے ہوئےفارم ہاؤس میں ڈانس پارٹی منعقد کرنے والے شخص سمیت 19 مہمانوں کو گرفتارکر کے فارم ہاؤس کو سیل کردیا۔

ملزمان نے گزشتہ رات گڈاپ ٹاؤن کے علاقےمیں واقع فارم ہاؤس ڈانس پارٹی کا اہتمام کیا تھا، ایس ایس پی ملیرعرفان بہادر کے مطابق گرفتار افراد میں 07 خواتین بھی شامل ہیں،پولیس نے فارم ہاؤس سے شیشہ،حقہ، تمباکو اور دیگر سامان تحویل میں لے لیاہے۔

ایس ایس پی ملیر کا کہنا تھا کہ گرفتار افراد حکومت کی جانب سے جاری کئے گئے کورونا ایس او پیز کی خلاف ورزی کے مرتکب ہوئےاسی وجہ سے کارروائی کی گئی ہے،پولیس نے گرفتار افراد کیخلاف مقدمہ نمبر 219/2021 درج کر لیا۔گرفتار افراد کو تفتیشی حکام کے حوالے کر دیا گیاہے۔

اس سے قبل مقامی عدالت نے کورونا ایس او پیز اور لاک ڈاؤن کے باعث عائد بندشوں کی مبینہ خلاف ورزی پر گرفتار ہونے والے 300 افراد کو انسانی ہمدردی کی بنیاد پر رہا کردیا۔

پولیس نے ضلع جنوبی کے مختلف علاقوں سے مبینہ طور پر کووڈ-19 ایس او پیز کی خلاف ورزی پر تقریبا 300 افراد کو گرفتار کیا تھا۔گرفتار افراد کے خلاف تعزیرات پاکستان کے سیکشن 188 کے تحت کئی فرسٹ انفارمیشن رپورٹس درج کی گئی تھیں۔