گوگل نیوز پر ہمیں فالو کریںمشرق وسطیٰ میں جاری کشیدگی کے دوران گھوسٹ اکاؤنٹ سے بھارت اور افغانستان جیسے ممالک پاکستان کے خلاف پراپیگنڈا آپریشن میں ملوث ہیں۔ خطے کے امن کے خلاف سازش بے نقاب ہو گئی ہے، جس کے تحت سوشل میڈیا پر جعلی اکاؤنٹس کے ذریعے پاکستان مخالف پروپیگنڈا مہم کا آغاز ہوگیا۔
ذرائع کا حوالہ دیتے ہوئے میڈیا رپورٹس میں کہا گیا کہ اس مہم میں جعلی ایرانی شناختوں کا سہارا لے کر پاکستان کے خلاف نفرت انگیز بیانیہ گھڑا گیا اور عالمی سطح پر ملک کی ساکھ کو نقصان پہنچانے کی کوشش بھی کی جارہی ہے۔
میڈیا رپورٹس کے مطابق ڈس انفارمیشن آپریشن مہم خفیہ نیٹ ورک کے ذریعے لانچ کی گئی، جس کا آغاز مبینہ طور پر ایران سے منسوب جعلی میڈیا پلیٹ فارمز اور گھوسٹ ایکس (سابقہ ٹوئٹر) اکاؤنٹس کے ذریعے ہوا۔
رپورٹس کے مطابق ذرائع کا کہنا ہے کہ اس مہم کے تحت پاکستان پر امریکا کے لیے تیل ترسیل جیسے بے بنیاد الزامات بھی عائد کیے گئے تاکہ نفرت انگیز پروپیگنڈے کو فروغ دیا جاسکے۔
مزید انکشاف یہ بھی سامنے آیا کہ ایرانی شناخت رکھنے والے درجنوں سوشل میڈیا اکاؤنٹس درحقیقت بھارت اور افغانستان سے آپریٹ ہو رہے ہیں، جن کا مقصد مشرق وسطیٰ میں پاکستان کی امن کوششوں کو ناکام بنانا ہے۔
سیکیورٹی ذرائع کا کہنا ہے کہ یہ منظم ڈس انفارمیشن مہم خطے میں کشیدگی بڑھانے اور پاکستان کو عالمی سطح پر تنہا کرنے کی ایک کوشش قرار دی جا رہی ہے، جس کا مقصد ملک کی سفارتی کامیابیوں سے ہونے والی خفت مٹانا بھی ہوسکتا ہے۔
