گوگل نیوز پر ہمیں فالو کریںپاکستان میں سونے کی قیمتوں میں بدھ کے روز نمایاں اضافہ دیکھنے میں آیا، جو عالمی منڈی میں قیمتوں میں اضافے کا عکس ہے۔
آل پاکستان صرافہ جیولرز ایسوسی ایشن کی جانب سے جاری کردہ اعداد و شمار کے مطابق 24قیراط سونے کی فی تولہ قیمت میں 1300 روپے کا اضافہ ہوا ہے جس کے بعد نئی قیمت 3 لاکھ 59 ہزار 300 روپے ہو گئی ہے۔ گزشتہ روز یہ قیمت 3 لاکھ 58 ہزار روپے تھی۔
اسی طرح چوبیس قیراط سونے کے دس گرام کی قیمت میں بھی 1114 روپے اضافہ ہوا جس کے بعد نئی قیمت 3 لاکھ 8 ہزار 41 روپے ہو گئی جو کہ گزشتہ روز 3 لاکھ 6 ہزار 927 روپے تھی۔
22قیراط سونے کے دس گرام کی قیمت میں 1022 روپے اضافہ ہوا جس کے بعد یہ قیمت 2 لاکھ 82 ہزار 381 روپے ریکارڈ کی گئی۔
چاندی کی قیمتوں میں بھی اضافہ دیکھنے میں آیا۔ فی تولہ چاندی کی قیمت میں 39 روپے اور دس گرام چاندی کی قیمت میں 33 روپے اضافہ ہوا جس کے بعد یہ بالترتیب 4 ہزار 10 روپے اور 3 ہزار 437 روپے ہو گئیں۔
عالمی منڈی میں بھی قیمتی دھاتوں کی قیمتوں میں اضافہ ریکارڈ کیا گیا۔ سونے کی قیمت میں تیرہ امریکی ڈالر کا اضافہ ہوا، جس کے بعد یہ قیمت 3 ہزار 366 امریکی ڈالر فی اونس ہو گئی۔
چاندی کی قیمت میں صفر اعشاریہ 39 امریکی ڈالر کا اضافہ ہوا اور یہ 37اعشاریہ 77 امریکی ڈالر فی اونس ہو گئی۔
سونے اور چاندی کی بڑھتی ہوئی قیمتیں عالمی معاشی بے یقینی، افراطِ زر اور سرمایہ کاروں کی محفوظ سرمایہ کاری کی تلاش کی عکاسی کرتی ہیں۔
