گوگل نیوز پر ہمیں فالو کریںمشرق وسطیٰ کی کشیدگی کے باعث ملک میں جاری توانائی کے بحران کے پیش نظر پنجاب حکومت نے اہم اقدامات کے لیے تیاری شروع کر دی ہے۔ محکمہ توانائی نے وزیراعلیٰ پنجاب کو نئی سفارشات پیش کی ہیں جن میں تعلیمی اداروں، نجی شعبے اور عوامی سہولیات سے متعلق اقدامات شامل ہیں۔
ذرائع کے مطابق 15 اپریل تک اسکولوں اور کالجوں میں چھٹیوں کی تجویز دی گئی ہے جبکہ تعلیمی اداروں میں ہائبرڈ نظام تعلیم متعارف کروانے پر بھی غور کیا جا رہا ہے تاکہ طلبہ کی تعلیم متاثر نہ ہو۔
وفاقی حکومت کی طرز پر فیول کی راشننگ کا منصوبہ بھی زیر غور ہے جس کے تحت پیٹرول اور ڈیزل کی منصفانہ تقسیم کے لیے کوپن یا ڈیجیٹل سسٹم نافذ کیا جا سکتا ہے۔ اس کے علاوہ مخصوص دنوں میں محدود گاڑیوں کو ایندھن فراہم کرنے کی تجویز بھی شامل ہے۔
نجی اداروں کے لیے ورک فرام ہوم لازمی بنانے کی سخت ہدایات کی سفارش کی گئی ہے۔ غیر ضروری تقریبات پر پابندی جبکہ میٹرو اور بس سروس بڑھانے کی تجویز بھی زیر غور ہے تاکہ شہری نقل و حمل میں سہولت حاصل کر سکیں۔
توانائی کی بچت کے لیے ایل ای ڈی بل بورڈز اور آرائشی لائٹس بند کرنے کا پلان شامل کیا گیا ہے۔ رات 10 بجے کے بعد اسٹریٹ لائٹس متبادل موڈ پر چلائی جائیں گی اور مارکیٹ کے اوقات کار کو مزید محدود کرنے کی بھی سفارش کی گئی ہے۔
