گوگل نیوز پر ہمیں فالو کریںبالی ووڈ فلم “گستاخ عشق” کا ٹریلر جاری ہو گیا ہے، جس میں وِجے ورما اور فاطمہ ثنا شیخ کے ساتھ سینئر اداکار نصیر الدین شاہ بھی نظر آئیں گے۔
یہ رومانی فلم جس میں اردو شاعری کی جھلکیاں شامل ہیں، پرانی دہلی کے پس منظر میں بنائی گئی ہے اور یہ 28 نومبر 2025 کو سینما گھروں میں ریلیز ہوگی۔
کہانی نوازالدین (وِجے ورما) کے گرد گھومتی ہے، جو مشہور اردو شاعر (نصیر الدین شاہ) کے گھر جا کر شاعری سیکھتا ہے۔
وہاں اس کی ملاقات شاعر کی بیٹی (فاطمہ ثنا شیخ) سے ہوتی ہے اور دونوں میں ایک رومانی تعلق پروان چڑھتا ہے۔ تاہم عملی زندگی میں حالات ان کیلئے مشکل ثابت ہوتے ہیں، ایک پُراسرار قتل اور مالی مشکلات ان کے بیچ حائل ہوجاتی ہیں، جو بالآخر غلط فہمیوں اور اختلافات کی وجہ سے دل دہلا دینے والی جدائی تک لے جاتی ہیں۔
فلم میں شارب ہاشمی کا بھی اہم کردار شامل ہے۔ یہ پروجیکٹ مشہور فیشن ڈیزائنر منیش ملہوترا کے فلم پروڈیوسر کے طور پر کیریئر کا آغاز ہے، جسے انہوں نے ایک “جذباتی پروجیکٹ” قرار دیا ہے۔
فلم کا دل کو چھو لینے والا میوزک وشال بھردواج نے ترتیب دیا ہے، جبکہ مشہور شاعر گلزار نے دل کو متاثر کرنے والے بول لکھے ہیں۔ ساؤنڈ ڈیزائن آسکر جیتنے والے ریسول پوکٹی نے کیا ہے۔
