کورونا کے پھیلاؤ کا خدشہ، ہزارہ یونیورسٹی 10 روز کیلئے بند کردی گئی

پشاور: ملک کے دیگر صوبوں کی  طرح خیبر پختونخوا میں بھی کورونا کیسز میں اضافہ ریکارڈ کیا گیا ہے۔ ہزارہ یونیورسٹی کورونا کے پھیلاؤ کے خدشے کے پیشِ نظر 10 روز کیلئے بند کردی گئی ہے۔

خیبر پختونخوا کے دیگر ڈویژنز کی طرح ہزارہ ڈویژن میں بھی کورونا کا نتیجہ مثبت آنے کی شرح بڑھ گئی۔ ضلعی انتظامیہ نے جامعہ ہزارہ کے اسٹاف میں کورونا مثبت کیسز رپورٹ ہونے کے بعد یونیورسٹی میں تعلیمی عمل 10روز کیلئے معطل کردیا۔

یہ بھی پڑھیں:

کورونا کا پھیلاؤ، ملک کے بڑے شہروں میں تعلیم متاثر، جامعات بند کردی گئیں

آج سے تعلیمی عمل کے ساتھ ساتھ مانسہرہ یونیورسٹی میں ہونے والے امتحانات کو بھی ملتوی کردیا گیا ہے۔ جامعہ مانسہرہ کی انتظامیہ کا کہنا ہے کہ ملتوی کیے جانے والے پرچے طلبہ سے 15فروری کے بعد لیے جائیں گے۔ 

خیال رہے کہ اس سے قبل خیبر پختونخوا کے دارالحکومت پشاور اور پنجاب کے بہاولپور ڈویژن میں بھی تعلیم کورونا سے متاثر ہوئی۔ وائرس کے پھیلاؤ کے باعث ملک کے بڑے شہروں میں 2 بڑی جامعات کو بند کردیا گیا۔

آج سے 8 روز قبل 30 جنوری کو کورونا کیسز کے پیشِ نظر پشاور کی شہید بے نظیر بھٹو ویمن یونیورسٹی تاحکمِ ثانی بند کردی گئی۔ انتظامیہ نے یونیورسٹی کی بندش کا باضابطہ اعلامیہ جاری کردیا جس کے نتیجے میں تعلیم کا سلسلہ رک گیا۔