گوگل نیوز پر ہمیں فالو کریںمحکمہ موسمیات پاکستان (پی ایم ڈی) کے مطابق، اتوار یکم جون 2025 کو ملک کے بیشتر حصوں میں موسم گرم اور خشک رہنے کا امکان ہے، جب کہ میدانی علاقوں میں شدید گرمی پڑنے کی پیشگوئی کی گئی ہے۔
وفاقی دارالحکومت اسلام آباد اور آس پاس کے علاقوں میں بھی موسم زیادہ تر گرم اور خشک رہے گا۔ دن کے وقت جزوی طور پر ابر آلود موسم متوقع ہے، تاہم بارش کے امکانات کم ہیں۔
پنجاب کے بیشتر اضلاع میں موسم گرم اور خشک رہے گا، خاص طور پر میدانی علاقوں میں شدید گرمی پڑنے کا امکان ہے۔ البتہ مری، گلیات، جہلم، چکوال، سیالکوٹ اور نارووال میں جزوی طور پر ابر آلود موسم کے ساتھ کہیں کہیں آندھی اور گرج چمک کے ساتھ بارش متوقع ہے۔
خیبر پختونخوا کے زیادہ تر اضلاع میں بھی موسم انتہائی گرم رہے گا۔ پشاور، مانسہرہ، کوہستان، ایبٹ آباد اور ہری پور جیسے علاقوں میں شام کے وقت آندھی، تیز ہوائیں اور گرج چمک کے ساتھ بارش کا امکان ہے۔
سندھ اور بلوچستان کے زیادہ تر اضلاع میں موسم شدید گرم اور خشک رہے گا۔ کراچی سمیت ساحلی علاقوں میں بھی گرمی کی شدت برقرار رہنے کا امکان ہے۔ اس دوران بعض علاقوں میں گرد آلود ہوائیں چلنے کی توقع ہے۔
آزاد کشمیر اور گلگت بلتستان میں جزوی طور پر ابر آلود موسم رہے گا۔ ان علاقوں میں کہیں کہیں گرج چمک کے ساتھ بارش اور تیز ہوائیں چلنے کا بھی امکان ظاہر کیا گیا ہے۔ کشمیر کے بعض مقامات پر موسلا دھار بارش بھی ہو سکتی ہے۔
محکمہ موسمیات نے شہریوں کو مشورہ دیا ہے کہ شدید گرمی سے بچنے کے لیے دن کے وقت غیر ضروری باہر نکلنے سے گریز کریں، پانی کا زیادہ استعمال کریں اور بچوں و بزرگوں کا خاص خیال رکھیں۔
