بلڈنگ کنٹرول کا نظام بلڈر مافیا نے سنبھال لیا، غیر قانونی تعمیرات کی بھرمار

کراچی : شہر قائد میں حکومت نام کی کوئی چیز نظر نہیں آرہی، سرکاری “رٹ”متعلقہ اداروں کے افسران نے ختم کر دی، غیر قانونی تعمیرات کو ایس بی سی اے افسران کی کھلی چھوٹ ، بس بھاری نذرانے دو اور جہاں دل چاہے غیر قانونی عمارتیں تعمیر کرو۔پورے شہر میں لاک ڈاؤن کے باوجود غیر قانونی تعمیرات جاری ہیں۔

ناظم آباد ، نارتھ ناظم آباد ، نیو کراچی، لیاقت آباد، لانڈھی ،جمشید اور گلشن اقبال میں غیر قانونی تعمیرات کی جارہی ہیں۔ناظم آباد نمبر 2 لیاقت آباد ٹاؤن کی حدود میں پلاٹ نمبر 11 سب بلاک نمبر2 پر 208 گز کو مزید 62 گز غیر قانونی قبضہ شدہ زمین میں شامل کر کے 270 گز پر 9 منزلہ عمارت تیار کی جا رہی ہے، ایس بی سی اے افسران نے مبینہ بھاری نذرانوں کے عوض نظریں چرا لیں۔

سندھ بلڈنگ کنٹرول آرڈیننس 1979 کی دفعہ نمبر 7-اے کی خلاف ورزی کی۔ صدف گرینڈز عمارت کے بیسمنٹ کے ساتھ ساتھ 20 دکانیں اور غیر قانونی میزنائین سمیت 9 منزلہ عمارت تعمیر کر دی گئی۔ جمشید ٹاؤن کے علاقے کراچی ایڈمن سوسائٹی بلاک 7 پلاٹ A 443 پر لاک ڈائون کے دوران بلڈر نے دو منزلیں تعمیر کرلی ہیں۔

بتایاجاتا ہے کہ بلڈر نے کے بی سی اے کے علاقائی انسپکٹر سے دس لاکھ فی فلیٹ ڈیل کی ہے ۔مکینوں کے مطابق بلڈر نے مکسچر مشین کے بغیر لاک ڈاؤن کی خلاف ورزی کرتے ہوئے مزدوروں کی فوج لگا کر ہاتھ سے چھت بھرائی ہے، علاقے میں کورونا پھیلنے کا امکان ہے۔

مزید پڑھیں: ایس بی سی اے افسران نے غیر قانونی تعمیرات کو نوٹس جاری کرکے کروڑوں بٹور لیے

تھانہ ٹیپو سلطان کی عقبی گلی میں صبح سویرے کام شروع ہوجاتا ہے پولیس بھی تعمیرات کی سرپرستی سے بھاری نذرانہ وصول کر رہی ہے۔لانڈھی نمبر 4ایریا 3-Bگلی نمبر 64 پلاٹ نمبر 3 کے آدھے حصے 40 گرز پر تیسری منزل کی تعمیر کا کام جاری ہے جبکہ لانڈھی نمبر 4ایرا 3-Bگلی نمبر 65کے پلاٹ نمبر01 پر بھی صرف 40گز پر تیسری منزل کے بعد بھی تعمیرات جاری ہیں۔

یہ علاقہ لانڈھی تھانہ کے عقب میں ہے اور علاقہ پولیس نے یہاں سے مبینہ طور پر بھاری نذرانہ وصول کر لیا ہے جبکہ ایس بی سی اے کے اسسٹنٹ ڈائریکٹربلڈنگ انسپکٹرنے مبینہ طور پر فی عمارت 50 ہزار روپے وصول کیے ہیں اور اپنے ڈائریکٹر اور ڈپٹی ڈائریکٹر کو اندھیرے میں رکھا ہوا ہے۔