گوگل نیوز پر ہمیں فالو کریںانڈیا نے پاکستان کو پانچ وکٹس سے شکست دے کر ایشیا کپ 2025 جیت لیا۔
پاکستانی ٹیم نے بھارت کو جیت کیلئے 147 رنز کا ہدف دیا تھا جسے بھارتی ٹیم نے 19.4 اوورز میں 5 وکٹوں کے نقصان پر حاصل کرلیا، بھارت نے 9ویں مرتبہ ایشیاکپ کا ٹائٹل اپنے نام کیا، تلک ورما 69 اور شیوم ڈوبے 33 رنز بناکر نمایاں رہے۔
بھارتی ٹیم نے147 رنز کا ہدف 2 گیند پہلے حاصل کیا، سنجو سیمسن نے 21 گیندوں پر 24 رنز اسکور کیے، شبمن گل 12، ابھیشیک شرما 5 اور سوریاکمار ایک رن بناسکے۔
پاکستان کی طرف سے فہیم اشرف نے 3 وکٹیں حاصل کیں، شاہین آفریدی اور ابرار احمد نے 1، 1 وکٹ حاصل کی۔
اس سے قبل پہلے بیٹنگ کرتے ہوئے ایشیاکپ فائنل میں بھی پاکستان کی بیٹنگ بُری طرح فلاپ ثابت ہوئی، اچھے آغاز کے باوجود پور ٹیم 146 رنز پر ڈھیر ہوگئی۔
پاکستان بھارت کے درمیان فائنل ٹاکرے میں پاکستانی بلے بازوں نے قوم کو پھر سے مایوس کیا، پوری ٹیم 19.1 اوور آل آؤٹ ہوگئی اور روایتی حریف کو جیت کےلیے معمولی 147 رنز کا ہدف دیا۔
ٹاپ تھری کےعلاوہ پاکستان کا کوئی بیٹر ڈبل فگرمیں داخل نہ ہوسکا، اوپنرز نے پاکستان کو 84 رنز کا شاندار آغاز فراہم کیا، تاہم پاکستان نے آخری 9 وکٹیں صرف 33 رنز کے فرق سے گنوائیں۔
پاکستان نے بھارت کے خلاف ایک وکٹ کے نقصان پر 12ویں اوور میں 100 رنز مکمل کرلیے تھے اور ایک مرحلے پر پاکستان کی 113 رنز پر صرف ایک وکٹ گری تھی، تاہم اس کے بعد وکٹوں کی جھڑی لگ گئی۔
ایشیاکپ فائنل میں اوپنر صاحبزادہ فرحان نے بھارت کےخلاف پھر شاندار نصف سنچری اسکور کی، پاکستانی بیٹر نے 35 گیندوں پر نصف سنچری مکمل کی، ان کی اننگ میں 2 چھکے اور 5 چوکے شامل رہے۔
وہ 38 بالز پر 57 رنز کی جارحانہ اننگز کھیل کر آؤٹ ہوئے، صاحبزادہ فرحان کے علاوہ فخرزمان 47 رنز بناکر نمایاں رہے، صائم ایوب 14 رنز بنا سکے۔
محمد حارث، فہیم اشرف اور شاہین شاہ آفریدی بغیر رن بنائے آؤٹ ہوئے جبکہ حسین طلعت ایک اور حارث رؤف نے 6 رنز بناکر پویلین کی راہ لی۔
