گوگل نیوز پر ہمیں فالو کریںکراچی میں راشد منہاس روڈ کے ایک شاپنگ مال کے باہر اتوار کی شام ایک جھگڑا پیش آیا جس کی ویڈیو سوشل میڈیا پر وائرل ہو گئی ہے۔ ویڈیو میں دیکھا جا سکتا ہے کہ لفٹر ڈرائیور اور کار سوار کے درمیان تلخ کلامی کے بعد صورتحال کشیدہ ہو گئی اور کار سوار نے پستول نکال کر دھمکیاں دینا شروع کر دیں۔
پولیس حکام کے مطابق واقعے کا مقدمہ شاپنگ مال کے ایک ملازم کی مدعیت میں صنعتی ایریا تھانے میں درج کیا گیا ہے۔ مقدمے کے متن میں کہا گیا ہے کہ ملزم نے لفٹر ڈرائیور کو اسلحہ تان کر جان سے مارنے کی دھمکیاں دی ہیں اور گالیوں کا بھی استعمال کیا۔
کراچی راشد منہاس روڈ پت شاپنگ مال کے باہر نو پارکنگ ایریا سے گاڑی لفٹ کرنے پر بااثر نوجوان نے لفٹر ڈرائیور پر پستول تان لی pic.twitter.com/mKzcUWGZTU
— Shahid Hussain (@ShahidHussainJM) January 27, 2026
اہلکاروں کے مطابق جھگڑا شاپنگ مال کے کنسٹرکشن گیٹ کے سامنے پیش آیا۔ ملزم کے خلاف جان سے مارنے کی کوشش کے الزامات کے تحت مقدمہ درج کیا گیا ہے اور واقعے کی مزید تحقیقات جاری ہیں۔ پولیس نے علاقے کے سی سی ٹی وی فوٹیج اور گواہان کے بیانات بھی ریکارڈ کر لیے ہیں تاکہ حقائق کی مکمل وضاحت کی جا سکے۔
شہریوں کا کہنا ہے کہ اگر کوئی غریب شخص کسی چھوٹے جرم میں ملوث ہوتا ہے تو فوری گرفتار کر لیا جاتا ہے، لیکن ایسے با اثر ملزمان کے معاملے میں اکثر پولیس کہتی ہے کہ تحقیقات جاری ہیں اور معاملہ دبانے کی کوشش کی جاتی ہے۔
یہ واقعہ شہریوں کے لیے خطرے کی علامت ہے اور اس نے شاپنگ مال کے ارد گرد امن و امان کے حوالے سے خدشات پیدا کر دیے ہیں۔
