سیاحت کیلئے پاکستان آنیوالا جاپانی شہری بھٹک گیا، کراچی پولیس کی آؤ بھگت

کراچی: سیر و سیاحت کی غرض سے پاکستان آنے والا جاپانی شہری بھٹک کر شہرِ قائد کے علاقے اورنگی پہنچ گیا جہاں کراچی پولیس نے غیر ملکی شہری کی آؤ بھگت اور ہر ممکن مدد کی ہے۔

تفصیلات کے مطابق پاکستان گھومنے آیا ہوا جاپانی شہری کراچی گھومنے نکلا تو بھٹک کر اورنگی جا نکلا جہاں پولیس نے چیکنگ کے دوران حفاظتی تحویل میں لے کر منزل تک پہنچایا۔

یہ بھی پڑھیں:

شمالی وزیرستان میں سکیورٹی فورسز کا آپریشن، 1 دہشت گرد ہلاک

جاپانی شہری تاماذاکی تاکیویا اپنے علاقے میں گھومتا ہوا پا کر گشت کرنے والی اورنگی ٹاؤن پولیس نے پوچھ گچھ کیلئے روک لیا جس کے غیر ملکی ہونے پر اعلیٰ افسران کو آگاہ کیا گیا۔

غیر ملکی شہری کو اورنگی ٹاؤن میں واقع ایس ایس پی ویسٹ کے دفتر پہنچادیا گیا۔ تاماذاکی تاکیویا کراچی کے علاقوں سے ناواقفیت کی بنیاد پر بھٹک کر اورنگی پہنچا تھا۔

ایس ایس پی ویسٹ آفس میں پولیس نے جاپانی باشندے کی آؤ بھگت اور مہمان نوازی کی اور اسے بحفاظت غیر ملکیوں کی سکیورٹی کیلئے قائم پولیس کے سیل پہنچا دیا گیا۔

شہری کی مدد کرنے پر جاپانی قونصلیٹ نے کراچی پولیس کی تعریف اور شکریہ ادا کیا۔ تاماذاکی تاکیویا دنیا کی سیر پر نکلا ہے جو 104 ممالک کا دورہ کرچکا ہے۔

دنیا بھر کی سیر پر نکلے ہوئے جاپانی شہری تاماذاکی تاکیویا نے پاکستان کے سب سے بڑے شہر کراچی کی سیر مکمل کر لی جو اب پاکستان کے دیگر شہروں کی سیر پر روانہ ہوگا۔