کراچی: پانی کی شدید قلت کا خدشہ، دھابیجی پمپنگ اسٹیشن کے 7 پمپ کب تک بند رہیں گے؟

ترجمان واٹر کارپوریشن کا کہنا ہے کہ نئی لائن منسلک کرنے کے دوران دھابیجی پمپنگ اسٹیشن کے9 میں سے 7 پمپ 48 گھنٹوں کے لیے بند رہیں گے، 27 اپریل کو 7 پمپس سے پانی کی سپلائی بحال کی جائے گی جبکہ 2 پمپس 5 روز کیلئے مزید بند رہیں گے۔

واٹر کارپوریشن حکام کا کہنا ہے کہ لائن منسلک کرنے کے دوران نارتھ کراچی، سرجانی، اسکیم 33، گلستانِ جوہر، گلشن اقبال، لانڈھی، صدر، کورنگی اور چنیسر ٹاؤن سمیت مختلف علاقوں میں پانی کی فراہمی کا سلسلہ معطل رہے گا۔

حکام کا کہنا ہے کہ عوام پانی کی قلت کے پیش نظر متبادل انتظام ضرور کریں۔ اس دوران نیپا، صفورا اور سخی حسن ہائیڈرنٹس بند رہیں گے، جس سے کراچی کے شہریوں کو یومیہ تقریباً 250 ملین گیلن پانی کی قلت کا سامنا ہوگا۔