گوگل نیوز پر ہمیں فالو کریںکراچی کے چھ سالہ محمد ابراہیم انفرادی گنیز ورلڈ ریکارڈ قائم کرکے دنیا کے سب سے کم عمر مارشل آرٹس کھلاڑی بن گئے ہیں۔
محمد ابراہیم نے مارشل آرٹس کے ذریعے صرف ایک منٹ میں 45 بوتلوں کے ڈھکن لات مار کر کھولے۔ اس سے پہلے یہ ریکارڈ 40 بوتلوں کے ڈھکن کھولنے کا تھا، جسے ابراہیم نے توڑ دیا۔
گنیز ورلڈ ریکارڈز نے اس کارنامے کو نئی کیٹیگری میں تسلیم کر لیا ہے۔ اس موقع پر پاکستان اکیڈمی آف مارشل آرٹس نے متعدد مارشل آرٹس ماہرین کو دعوت دی۔ محمد ابراہیم پاکستان کی تاریخ کے عالمی ریکارڈ ہولڈر راشد نسیم کے بیٹے ہیں۔
دلچسپ بات یہ ہے کہ راشد نسیم کی بیٹی نے بھی 7 سال کی عمر میں گنیز ورلڈ ریکارڈ قائم کیا تھا جبکہ راشد نسیم کے والد اور اہلیہ بھی گنیز ورلڈ ریکارڈز میں اپنے نام درج کرا چکے ہیں۔
راشد نسیم نے اس موقع پر کہا، “میری فیملی اور میں پاکستان کے لیے مزید اعزازات لاتے رہیں گے۔ اب تک 16 طلبہ نے گنیز ورلڈ ریکارڈز میں اپنے نام درج کروائے ہیں۔”
انہوں نے مزید کہا، “حکومتی سپورٹ کے بغیر یہ سفر انتہائی مشکل ہو گیا ہے لیکن میں نے حوصلہ نہیں چھوڑا اور اپنی صلاحیتوں کو اپنے طلبہ تک منتقل کر رہا ہوں۔”
دوسری جانب دنیا کے سب سے کم عمر عالمی ریکارڈ ہولڈر محمد ابراہیم نے اپنی خواہش کا اظہار کرتے ہوئے کہا کہ وہ پاکستان کے صدر، وزیراعظم اور گورنر سندھ کی جانب سے مدعو کیے جانے کے خواہش مند ہیں۔
