اغوا برائے تاوان کی واردات جس میں پیسہ نہیں بٹ کوائن وصول کیا گیا

لکھنؤ: بھارت میں اغوا برائے تاوان کی واردات کا ایک واقعہ پیش آیا جس میں پیسہ نہیں بلکہ بٹ کوائن وصول کیا گیا۔

تفصیلات کے مطابق بھارتی ریاست اتر پردیش کے دارالحکومت لکھنؤ میں ایک تاجر کو اغوا کر کے بٹ کوائن کا ڈیجیٹل تاوان لینے والے تین اغوا کاروں کو پولیس نے گرفتار کر لیا ہے۔

پولیس کے مطابق سات اگست کی شام کو لکھنؤ کے ایک تاجر کو اغوا کیا گیا اور ان سے چار اغوا کاروں نے ایک کروڑ سے زائد مالیت کے بٹ کوائنز تاوان کے طور پر لیے اور مغوی تاجر کو تشدد کا نشانہ بنانے کے بعد سڑک کنارے پھینک دیا گیا۔

پولیس نے بتایا کہ 16 اگست کو پولیس نے اس معاملے میں تین ملزمان سندیپ پرتاپ سنگھ، رنویر سنگھ اور وجے پرتاپ سنگھ کو گرفتار کیا ہے۔

یہ بھی پڑھیں:

ترکیہ میں کرپٹو کرنسی کا بانی 2 ارب ڈالرز لے کر فرار ہوگیا

پولیس کا کہنا تھا کہ اغوا کاروں نے ایک کروڑ تین لاکھ روپے تاوان کی رقم تاجر کے بٹ کوائن والیٹ سے اپنے ڈیجیٹل اکاؤنٹ میں منتقل کی۔

پولیس کے مطابق گرفتار ملزمان کے قبضے سے ایک پستول، کارتوس، ایک کار اور 30 ہزار روپے نقدی برآمد ہوئی ہے۔ پولیس کو تاوان کے لیے بٹ کوائن کے لین دین کے بارے میں بھی معلومات ملی ہیں۔

لکھنؤ ایسٹ کی ڈی سی پی پراچی سنگھ نے ایک بیان جاری کرتے ہوئے کہا کہ ’یہ واقعہ سات اور آٹھ اگست کی درمیانی شب پی جی آئی تھانے کی حدود میں پیش آیا تھا جس پر اگلے روز تاجر کی بیوی کی شکایت کی بنیاد پر مقدمہ درج کیا گیا۔ اس مقدمے میں اغوا برائے تاوان، ڈکیتی، جائیداد کی چوری، کسی شخص کو زخمی کرنا، بھتہ خوری، زندگی کو خطرے میں ڈالنا، دھمکی دینا سمیت دیگر تین دفعات شامل کی گئیں۔‘

پولیس کا کہنا ہے کہ تاجر کے بٹ کوائن والیٹ سے رقم فارم ہاؤس میں ہی اغوا کاروں کے بٹ کوائن اکاؤنٹ میں منتقل ہوئی تھی اور ایک کروڑ تین لاکھ روپے میں سے اب تک پولیس تقریباً 90 لاکھ واپس لے چکی ہے۔

پولیس کے مطابق اغوا کاروں کا چوتھا ساتھی اور سیتا پور کے فارم ہاؤس کا مالک ویرو بھی مطلوب ہے۔ پولیس کا کہنا ہے کہ اس کی گرفتاری کے لیے ٹیمیں تشکیل دے دی گئی ہیں اور جلد اسے گرفتار کر لیا جائے گا۔