کراچی، ملیر ندی میں ڈوب جانے والی کار سے لاپتہ خاتون کی لاش بھی برآمد

شہرِ قائد کی ملیر ندی میں ڈوب جانے والی کار سے لاپتہ خاتون کی لاش بھی برآمد کر لی گئی ہے، کار میں بچوں سمیت 7 افراد سوار تھے۔

تفصیلات کے مطابق کراچی میں ہونے والی شدید بارشوں کے باعث ندی نالوں میں طغیانی آگئی۔ چند روز قبل ملیر ندی کے سیلابی پانی میں کار ڈوب گئی۔ افسوسناک واقعے کے نتیجے میں کار پر سوار 7 میں سے 6افراد کی لاشیں برآمد کر لی گئیں۔

یہ بھی پڑھیں:

ملیر ندی میں ڈوبنے والے 2 افراد کی لاشیں مل گئیں، 5 کی تلاش جاری 

کراچی پولیس کا کہنا ہے کہ گزشتہ کچھ روز سے جاری ریسکیو آپریشن کے دوران لاپتہ خاتون کی لاش برآمد ہوئی جو مکمل طور پر گل چکی ہے۔ بال ایک جگہ جبکہ باقی جسم دوسری جگہ سے ملا۔ کنارے پر منتقل کر رہے ہیں۔

خیال رہے کہ ملیر میں لنک روڈ پر سیلابی ریلے میں ڈوبنے والے 7 افراد میں سے 2 کی لاشیں آج سے 3 روز قبل ملیں جبکہ 5 افراد کی تلاش کے لیے ریسکیو آپریشن جمعے کے روز پھر شروع کردیا گیا۔

ملیر میں موٹروے ایم 5 لنک روڈ پر سیلابی ریلے میں 2 روز قبل ڈوبنے والی کار میں سوار باقی 5 افراد کی لاشیں  تلاش کرنے کے لیے ایدھی فاؤنڈیشن کے رضاکاروں نے ریسکیو آپریشن صبح سویرے شروع کر دیا۔

ایس ایس پی عرفان بہادر کے مطابق ڈوبنے والی کار لنک روڈ سے 2 سے ڈھائی کلومیٹر دور صبح سویرے مل گئی جبکہ 2 کمسن بہن بھائیوں کی لاشیں جمعرات کو نکالی گئی تھیں۔