گورنر پنجاب کو حمزہ شہباز سے 28 اپریل تک وزیراعلیٰ کا حلف لینے کا حکم

لاہور: عدالت نے گورنر پنجاب عمر سرفراز چیمہ کو 28 اپریل تک حمزہ شہباز سے وزیراعلیٰ کا حلف لینے کا حکم دے دیا۔

لاہورہائی کورٹ نے فیصلہ سناتے ہوئے مزید کہا کہ اگر گورنر پنجاب حلف نہیں لینا چاہتے تو وہ صوبے کے وزیراعلیٰ کا حلف اٹھانے کے لیے کسی اور کو نامزد کر سکتے ہیں۔

حمزہ شہباز16 اپریل کو پنجاب کے وزیر اعلیٰ منتخب ہوئے تھے تاہم انہوں نے ابھی تک حلف نہیں اٹھایا ہے ۔

لاہور ہائی کورٹ نے منگل کو حمزہ شہبازکی درخواست پر فیصلہ محفوظ کر لیا تھا، یہ دوسرا موقع ہے جب مسلم لیگ (ن) نے معاملے کے حل کے لیے ہائی کورٹ سے رجوع کیا ہے۔

مزید پڑھیں:بلاول بھٹو زرداری آج وفاقی وزیر کے عہدے کا حلف اٹھائیں گے

قبل ازیں 22 اپریل کو لاہور ہائیکورٹ نے حمزہ شہباز کی درخواست پرفیصلہ سنایا تھا کہ گورنر کسی صوبے کے نو منتخب وزیر اعلیٰ سے حلف لینے سے انکار نہیں کر سکتا اور توقع ہے کہ صدر حمزہ شہباز کو حلف دلانے کے لیے کسی بھی شخص کو نامزد کریں گے۔

حمزہ شہبازنے اپنی نئی درخواست میں کہا کہ یہ بات عیاں ہے کہ گورنر اور صدر عدالتی حکم ماننے کو تیار نہیں ہیں، اس لیے ضروری ہے کہ آئین کے تحفظ اور اس کی دفعات کو نافذ کرنے کے لیے عدالت کی جانب سے ایک شخص کو نامزد کیا جائے۔

واضح رہے کہ پنجاب اسمبلی نے 16 اپریل کو ہنگامہ آرائی کے بعد حمزہ شہباز کو نیا وزیراعلیٰ منتخب کیا تھا۔پنجاب کے گورنر عمر سرفراز چیمہ کی جانب سے حمزہ شہباز شریف کے انتخاب کو غیر آئینی قرار دیتے ہوئے حلف لینے سے انکار کے بعد نومنتخب وزیراعلیٰ حمزہ شہباز شریف کی حلف برداری کا معاملہ زیربحث رہا۔