پیٹرولیم مصنوعات کی قیمتوں میں مزید اضافہ ہوگا، مفتاح اسماعیل

اسلام آباد: وفاقی وزیرِ خزانہ مفتاح اسماعیل نے آنے والے کچھ دنوں میں ملک میں پیٹرولیم مصنوعات کی قیمتوں میں مزید اضافے کا عندیہ دے دیا۔

نجی چینل سے گفتگو میں وزیرِ خزانہ نے کہا کہ اوگرا کے مطابق حکومت کو ڈیزل پر 55 روپے اور پیٹرول پر 28 سے 30 روپے کا نقصان ہو رہا ہے، اس لئے قیمتوں میں مزید اضافہ کرنا پڑے گا۔

وزیرِ خزانہ مفتاح اسماعیل نے پیٹرولیم مصنوعات کی قیمتوں کے حوالے سے کہا کہ 5 روپے ٹیکس لگانے سے 10 ارب روپے کی آمدن میں مدد ملے گی۔ 50 روپے ٹیکس لگایا جائے تو 100 ارب روپے اکٹھے ہوں گے۔ اگر ہم وقتاً فوقتاً لیوی میں اضافہ کرتے رہے تو سال کے آخر تک اس مد میں 750 ارب کی آمدنی ہو جائے گی۔ لیوی لگانے سے ہمارا بجٹ خسارہ قابو میں آئے گا۔

قبل ازیں اپنی بجٹ تقریر میں وزیر خزانہ مفتاح اسماعیل نے کہا کہ وزیراعظم شہباز شریف نے پٹرولیم کی قیمتوں کے پیش نظر کم آمدنی والے طبقہ کو تحفظ دینے کا فیصلہ کیا ہے۔ چنانچہ ان کی ہدایت پر40 ہزار روپے ماہانہ سے کم آمدنی والے خاندانوں کو دو ہزار روپے ماہانہ مدد دینے کا فیصلہ کیا گیا ہے جو کہ جون 2022 سے نافذ العمل ہے۔

یہ بھی پڑھیں:

امپورٹڈ حکومت کے پیش کردہ بجٹ کو مسترد کرتا ہوں، عمران خان

اُن کا کہنا تھا کہ اس ماہانہ امداد سے تقریبا 8 کروڑ سے زائد لوگوں کو فائدہ پہنچے گا،یہ امداد مالی سال 2022-23 کے بجٹ میں شامل کردی گئی ہے اس میں ضروری نہیں کہ کسی کے پاس کار یا موٹر سائیکل ہو بلکہ جو عوام بس میں سفر کرتے ہیں وہ بھی اس سے فائدہ اٹھا سکتے ہیں۔ جو مستحق افراد بی آئی ایس پی میں پہلے سے رجسٹرڈ ہیں ان کو جون کے مہینے میں دو ہزار روپے کی اضافی ادائیگی خودکار طریقے سے کی جارہی ہے۔ان میں مزید 60 لاکھ خاندانوں کو شامل کیا جارہا ہے جن کو ہر مہینے دو ہزار روپے دیئے جائیں گے۔

دوسری جانب وزیراعظم شہبازشریف نے کہا ہے کہ سستا پٹرول اور سستا ڈیزل اسکیم پورا سال جاری رہے گی، حکومت نے تیل کی قیمتیں بڑھا کر سیاسی مفاد کا نہیں پاکستان کے مفاد کو دیکھا ہے، ایک سال میں ملک کو شدید بحرانوں سے نکالنا کسی معاشی معجزے سے کم نہیں ہوگا۔