گوگل نیوز پر ہمیں فالو کریںبھارتی پنجاب سے تعلق رکھنے والی معروف سکھ گلوکارہ زارا گل کا پاکستان کے لیے عقیدت اور محبت سے لبریز نغمہ سوشل میڈیا پر وائرل ہو رہا ہے جسے صرف دھن ہی نہیں بلکہ اس کے جذباتی پیغام کی بنا پر بھی بے حد سراہا جا رہا ہے۔
یہ نغمہ جو اپنے مصرعے “اسی مردہ باد نہیں کہہ سکدے، بھل کے وی پاکستان نوں” کے نام سے مشہور ہو رہا ہے، روحانیت، ورثے اور سرحد پار ہم آہنگی جیسے موضوعات کو نہایت لطیف انداز میں جوڑتا ہے۔
اس میں بانیٔ سکھ مت، بابا گرونانک دیو جی کے اس تاریخی و روحانی تعلق کو اجاگر کیا گیا ہے جنہوں نے اپنی زندگی کا ایک بڑا حصہ موجودہ پاکستان کی سرزمین پر گزارا۔
زارا گل کے نغمے کے بول دونوں اطراف کے سکھوں کے دلوں کو چھو رہے ہیں۔ یہ نغمہ سننے والوں کو یاد دلاتا ہے کہ وہ مقدس زمین جہاں بابا نانک نے قدم رکھے، تبلیغ کی اور اپنی تعلیمات پھیلائیں، اسے کسی بھی سیاسی تعصب کے تحت کمتر نہیں سمجھا جا سکتا۔
یہ ایک سچی روحانی وابستگی اور پاکستان کی زمین سے دلی محبت کا اظہار ہے، جو بھارت کے موجودہ سیاسی ماحول میں بہت کم سننے کو ملتا ہے۔
رپورٹس کے مطابق مودی حکومت نے اس نغمے کو بھارتی پنجاب میں نشر کرنے پر پابندی عائد کر دی ہے۔ کہا جا رہا ہے کہ یہ اقدام حالیہ پہلگام حملے اور اس کے بعد بھارت میں بڑھتی ہوئی پاکستان مخالف جذبات کے تناظر میں کیا گیا ہے، جسے بھارتی میڈیا نے سیاسی رنگ دینے کی کوشش کی۔
بہت سے تجزیہ کار اس پابندی کو ایسے ثقافتی اظہار پر قدغن قرار دے رہے ہیں جو ریاستی بیانیے سے ہٹ کر کسی دوسری سوچ یا ہم آہنگی کا پیغام دیتے ہوں، خاص طور پر جب وہ پاکستان کے لیے عزت یا محبت کا پیغام ہوں۔
حکومتی کوششوں کے باوجود زارا گل کا نغمہ یوٹیوب اور دیگر سوشل میڈیا پلیٹ فارمز پر مسلسل مقبولیت حاصل کر رہا ہے۔ لاکھوں افراد اس نغمے کو شیئر کر رہے ہیں اور گلوکارہ کی جرات مندی اور محبت بھرے جذبات کی تعریف کر رہے ہیں۔
