ایلون مسک ٹوئٹر انتظامیہ پر برہم، ڈیل منسوخ کرنے کی دھمکی دیدی

لاس اینجلس: دنیا کے امیرترین انسان، ٹیسلا اور اسپیس ایکس کے بانی ایلون مسک جعلی اکاؤنٹس کی تفصیلات فراہم نہ کرنے پر ٹوئٹر انتظامیہ پر برہم ہوگئے اور ڈیل کو منسوخ کرنے کی دھمکی دے دی۔

تفصیلات کے مطابق ایلون مسک نے ٹوئٹر پر لاکھوں کی تعداد میں جعلی اور اسپیم اکاؤنٹس کی وجہ سے مائیکروبلاگنگ پلیٹ فارم کے ساتھ ہونے والے معاہدے کوہولڈ کر رکھا ہے۔

دوسری جانب ٹوئٹر انتظامیہ کا ردعمل دیکھتے ہوئے ایسا لگ رہا ہے کہ شاید وہ بھی اس معاہدے کو پایہ تکمیل تک پہنچانے میں کوئی دلچسپی نہیں رکھتی۔

ایلون مسک کے وکیل نے ٹوئٹرانتظامیہ کو لکھے گئے خط میں کہا ہے کہ ’مسک کو یقین ہے کہ کمپنی ( ٹوئٹر) بہت سرگرمی سے ان کے معلومات کے حقوق کی خلاف ورزی کررہی ہے۔‘

یہ بھی پڑھیں: ملک کے سرکاری دفاتر میں ای فائلنگ سسٹم نافذ، کاغذوں کا بوجھ کم ہونے لگا

ٹوئٹر انتظامیہ کو لکھے گئے خط میں کہا گیا ہے کہ اگر سوشل میڈیا پلیٹ فارم انہیں جعلی اوراسپیم اکاؤنٹ کا ڈیٹا دینے میں ناکام رہا تو پھر وہ ٹوئٹر کے ساتھ  ہونے والی 44 ارب ڈالر کے معاہدے سے پیچھے ہٹ سکتے ہیں۔ خط میں مزید کہا گیا ہے کہ ایلون مسک کے پاس اس معاہدے کو ختم کرنے کے تمام حقوق محفوظ ہیں۔

خط کے مطابق ٹیسلا کے بانی کو اس بات کا بھی یقین ہے کہ ٹوئٹر کی جانب سے معاہدے کے ضوابط پرعمل درآمد کے بجائے حیل حجت سے کام لینا مزید شکوک و شبہات پیدا کررہا ہے۔

واضح رہے کہ گزشتہ ماہ ایلون مسک نے مائیکرو بلاگنگ ویب سائٹ کے ساتھ ہونے والے معاہدے کو ’ہولڈ‘ کرنے کی ٹوئٹ کرکے ٹیکنالوجی اورکاروباری حلقوں میں ہلچل پیدا کردی تھی۔

ایلون مسک نے اپنی ٹوئٹ میں 2 مئی کوغیرملکی خبررساں ایجنسی رائٹرزکی ایک رپورٹ کا لنک بھی منسلک کیا تھا جس میں ٹوئٹر کو جعلی اوراسپیم اکاؤنٹس کی وجہ سے درپیش مسائل کو احاطہ تحریرمیں لایا  گیا تھا۔

اس معاہدے کوہولڈ کرنے کے حوالے سے ایلون مسک کا کہنا تھا کہ ’ٹوئٹرپرجعلی اوراسپیم اکاؤنٹس کی بڑی تعداد کی وجہ سے اس معاہدے کوعارضی طور پر روکا گیا ہے۔ ‘