ایک اور خاتون کوہِ پیما نائلہ کیانی کے ٹو سر کرنے میں کامیاب ہوگئیں

پاکستان کی ایک اور خاتون کوہِ پیما نائلہ کیانی نے کے ٹو کی چوٹی کامیابی سے سر کر لی ہے، اسی کے ساتھ ساتھ وہ کے ٹو سر کرنے والی دوسری پاکستانی خاتون کوہ پیما بن گئی ہیں۔

کوہ پیما نائلہ کیانی نے جمعہ کی صبح 10 بج کر 15 منٹ پر کے ٹو کے سر کی ہے جبکہ اس سے قبل ثمینہ بیگ نے بھی آج ہی صبح 7 بج کر 42 منٹ پر کے ٹو کی چوٹی سر کی، جس کے بعد ایک ہی دن میں دو پاکستانی خواتین نے کے ٹو سر کرکے تاریخ رقم کر دی۔

8611 میٹر بلند کے ٹو دنیا کی دوسری بلند ترین چوٹی ہے اور ثمینہ بیگ نے ٹو سر کرنے والی پہلی پاکستانی خاتون کوہ پیما کا اعزاز اپنے نام کیا ہے۔

نائلہ کیانی کا تعلق صوبہ پنجاب میں راولپنڈی شہر کے علاقے گجر خان کے ایک قدامت پسند خاندان سے ہے۔ انھوں نے ایرو اسپیس انجینیئرنگ کی تعلیم برطانیہ سے حاصل کر کے اپنے اس شعبے میں بھی کام کیا۔