گوگل نیوز پر ہمیں فالو کریںپاکستان نے اپنی آئی سی سی ویمنز ٹی 20 ورلڈ کپ مہم کا شاندار آغاز کرتے ہوئے پہلے میچ میں سری لنکا کو شکست دیدی۔
شارجہ کی سست وکٹ پر سوگندیکا کمارا اور چماری اتھاپتھو نے پاور پلے میں پاکستان کو ابتدائی دھچکا پہنچایااور پاکستانی ٹیم وقفے وقفے سے وکٹیں گنواتی رہی جس کے نتیجے میں قومی ٹیم ایک کمزور مجموعی اسکور 116 رنز پر محدود رہی۔
ندا ڈار اور عمائمہ سہیل نے بالترتیب 23 اور 18 رنز بنائے، جبکہ کپتان فاطمہ ثنا نے ساتویں نمبر پر آ کر 30 رنز کی دلیرانہ اننگز کھیل کر پاکستان کو 100 کا ہدف عبور کرنے میں مدد دی ۔ سری لنکا کی جانب سے اُدیشیکا پرابودانی، سوگندیکا اور چماری اتھاپتھو نے تین تین وکٹیں حاصل کیں۔
پاکستان کی باؤلنگ کے دوران ڈیانا بیگ کو پہلی ہی گیند کے بعد پنڈلی کی چوٹ کے باعث میدان سے باہر جانا پڑا۔ اس اوور کی باقی پانچ گیندیں کپتان فاطمہ ثنا نے کیں۔
کم ہدف کا دفاع کرتے ہوئے پاکستانی ٹیم نے سری لنکا کے خلاف اپنے افتتاحی ٹی 20 ورلڈ کپ میچ میں کافی جدوجہد کی۔ پاکستانی کپتان نے سری لنکن کپتان کو تیسرے اوور کی دوسری گیند پر پویلین بھیج دیا جب چماری اتھاپتھو نے کور ڈرائیو لگاکر عمائمہ سہیل کو ایکسٹرا کور پر کیچ تھما دیا۔
عمائمہ سہیل نے پاور پلے سے قبل ایک اور وکٹ حاصل کی، جب ہرشیتھا سماراوکرما گیند کو مس کر گئیں جو سیدھا ان کے مڈل اسٹمپ میں جا لگی۔ انہوں نے اپنے دوسرے اوور میں ایک اور وکٹ حاصل کی، جب ہاسینی پریرا صرف 8 رنز بنا کر آؤٹ ہو گئیں اور سری لنکا کی ٹیم 8 اوورز کے اختتام پر 35 رنز پر 3 وکٹیں گنوا بیٹھی۔
ایک بالر کی کمی کے باوجود پاکستان نے دباؤ بنائے رکھا اور اگلی وکٹ کاوشا دلہاری کی گری، جو ندا ڈار کے ہاتھوں لانگ آن پر کیچ ہو گئیں۔ نَشرا سندھو نے وشمی گنارتنے کی اہم وکٹ بھی لی، جو کریز پر مضبوطی سے کھڑی تھیں۔ وشمی نے چھکا مارنے کی کوشش کی لیکن سِدرہ امین کے ہاتھوں کیچ ہو گئیں۔
سری لنکا کی ٹیم پر دباؤ بڑھتا گیا کیونکہ زیادہ باؤنڈریز نہ مل سکیں اور وکٹیں بھی وقفے وقفے سے گرتی رہیں۔ سعدیہ اقبال نے اگلی وکٹ انوشکا سنجیوانی کی لی، جنہوں نے چھکا مارنے کی کوشش کی لیکن گُل فیروزہ نے کیچ پکڑ لیا۔
نِلکشیکا سیوا اگلی بیٹر تھیں جو 25 گیندوں پر 22 رنز بنانے کے بعد سعدیہ اقبال کی گیند پر آؤٹ ہو گئیں۔ سعدیہ اقبال نے اگلی ہی گیند پر سوگندیکا کمارا کو ایل بی ڈبلیو کر دیا، جس سے سری لنکا کی ٹیم 83 رنز پر 8 وکٹوں کے نقصان پر 19ویں اوور میں لڑکھڑا گئی۔
سچنی نیسانسالا سری لنکا کی دوسری آخری وکٹ تھیں، جب وکٹ کیپر منیبہ علی نے فاطمہ ثنا کی گیند پر شاندار کیچ پکڑا۔ اور پاکستان نے یہ میچ 31 رنز سے جیت لیا۔
