گوگل نیوز پر ہمیں فالو کریںملائیشیا کی رائل ایئر فورس کے سربراہ اور پاکستانی نژاد جنرل محمد اصغر خان نے حال ہی میں اپنے آبائی علاقے ہریانپور، ہری پور کا دورہ کیا۔
دورے کے دوران جنرل اصغر خان نے اپنے خاندان کے افراد سے ملاقات کی، اپنے مرحوم رشتہ داروں کی قبروں پر حاضری دی اور ان کے لیے دعائیں کیں۔
جمعہ کے روز انہوں نے ہری پور کے علاقے بہر ہریانپور کا مختصر دورہ کیا، جہاں انہوں نے اپنے مرحوم دادا ملک قلندر خان، چچا ملک یعقوب، کزن حافظ رمیز اور دادی کی قبروں پر فاتحہ خوانی کی۔
ضلعی پولیس افسر (ڈی پی او) فرحان خان کے مطابق جنرل اصغر خان کا دورہ تقریباً دو گھنٹے پر محیط تھا اس دوران انہوں نے اپنے رشتہ داروں کے ساتھ وقت گزارا اور خاندانی معاملات پر گفتگو کی۔
مقامی حکومت خیبر پختونخوا کے اسسٹنٹ ڈائریکٹر اور جنرل اصغر خان کے کزن مختار احمد نے بتایا کہ ملک قلندر خان پاکستان کے قیام سے قبل ملائیشیا منتقل ہو گئے تھے، جہاں جنرل خان کے والد گوہر امان اور ان کے چچا ملک محمد یعقوب پیدا ہوئے۔
گوہر امان بعد میں ملائیشین پولیس فورس میں افسر کے طور پر ریٹائر ہوئے۔مختاراحمد نے مزید بتایا کہ جنرل محمد اصغر خان کا تعلق اعوان قبیلے سے ہے اور وہ 2008 میں تربیت کے لیے کراچی بھی آ چکے ہیں۔
