پاکستان میں 13 ستمبر سے 15تا 18سال کے نوجوانوں کی ویکسی نیشن کا آغاز

اسلام آباد: حکومت نے ملک میں کورونا ویکسی نیشن کادائرہ وسیع کرتے ہوئے 13 ستمبر سے 15 تا 18 سال کے نوجوانوں کی ویکسی نیشن شروع کرنے کا اعلان کردیا ہے۔

ذرائع کے مطابق ملک میں کورونا وائرس کی چوتھی لہر کے تناظر میں ویکسین لگانے کی کوششیں تیز کرتے ہوئے حکومت نے 15 سے 18 سال تک کے نوجوانوں کی ویکسی نیشن شروع کرنے کا فیصلہ کیا ہے۔

ذرائع نے بتایا کہ 15 سے 18 سال کے نوجوانوں  کے لیے ویکسی نیشن مہم 13 ستمبر سے شروع ہوگی اور نوجوانوں کو فائزر ویکسین کے ٹیکے لگائے جائینگے۔

ذرائع کے مطابق نیشنل کمانڈ اینڈ آپریشن سینٹر نے 15 سے 18 سال کی عمر کے نوجوانوں کی ویکسی نیشن کی منظوری دیدی ہے۔

مزید پڑھیں:کورونا نے مزید 82 زندگیاں چھین لیں، 3480 نئے شکار

وفاقی حکومت نے اس سے قبل ملک میں 18 سال سے کم عمر افراد کے لیے ویکسی نیشن شروع کرنے منصوبے کا اعلان کیا تھااورپہلے مرحلے میں 15 اور 18 سال کی عمر کے لوگوں کے لیے ویکسی نیشن کی منظوری دی گئی ہے جبکہ دوسرے مرحلے میں 12 سے 15 سال کی عمر کے افراد کو ٹیکے لگائے جائیں گے۔

این سی او سی کے سربراہ اسد عمر نے گزشتہ روز کہا تھا کہ 50 ملین شہریوں کو ویکسین کی کم از کم ایک خوراک مل چکی ہے جبکہ 20 ملین سے زائد لوگوں کو وائرل بیماری کے خلاف مکمل طور پر ویکسین دی گئی ہے۔