”کوئی بھوکا نہ سوئے” پروگرام کامیابی کے بعد اپنی مثال آپ ہوگا، وزیر اعظم

اسلام آباد: وزیراعظم عمران خان نے کہا ہے کہ احساس ”کوئی بھوکا نہ سوئے” پروگرام کامیابی کے بعد نہ صرف پاکستان بلکہ دنیا بھر میں اپنی مثال آپ ہوگا۔اس پروگرام سے غریبوں کو فائدہ ہوگا۔

وزیرِ اعظم عمران خان نے احساس ”کوئی بھوکا نہ سوئے” اقدامات پر بریفنگ اجلاس کی صدارت کی، معاونِ خصوصی برائے تخفیفِ غربت و سماجی تحفظ ڈاکٹر ثانیہ نشتر نے وزیرِ اعظم کو منصوبے پر تفصیلی بریفنگ دی۔

بریفنگ میں بتایا گیا کہ وزیرِ اعظم کے ویژن کے مطابق احساس کے ذریعے غذائی قلت کے خطرے سے دوچار علاقوں کی نشاندہی کرکے منظم حکمتِ عملی سے کھانے کی فراہمی کو یقینی بنایا جائے گا۔اس نظام کی مکمل تیاری کے بعد اس کا آغاز رواں سال کی پہلی سہ ماہی کے اختتام تک کر دیا جائے گا۔

وزیرِ اعظم عمران خان کی احساس، "کوئی بھوکا نہ سوئے" اقدامات پر بریفنگ اجلاس کی صدارت.

معاونِ خصوصی برائے تخفیفِ غربت و سماجی تحفظ ڈاکٹر ثانیہ نشتر نے وزیرِ اعظم کو منصوبے پر تفصیلی بریفنگ دی pic.twitter.com/iKAg1OQYa9

— Prime Minister's Office (@PakPMO) January 6, 2021

دوسری جانب ڈاکٹر ثانیہ نشتر نے وزیرِ اعظم کو احساس ڈونر مینجمنٹ سسٹم پر بھی تفصیلی بریفنگ دی،جس کے ذریعے انفرادی اور اداروں کی سطح پر مرضی کے مطابق ڈونیشن دینے کے ساتھ ساتھ اس کے خرچ کی تفصیل خودکار اور ڈیجیٹل طریقے سے ڈونر تک جا سکے گی۔

وزیر اعظم کا مزید کہنا تھا کہ جامع منصوبہ بندی سے ایسا نظام لایا جائے جس سے مستحقین تک رسائی براہ راست اور آسان ہو، احساس ”کوئی بھوکا نہ سوئے” پروگرام کامیابی کے بعد نہ صرف پاکستان بلکہ دنیا بھر میں اپنی مثال آپ ہوگا۔

وزیرِ اعظم عمران خان نے مستحق افراد کو کھانا فراہم کرنے کیلئے پیش کی گئی تجاویز کو سراہتے ہوئے اس بات پر زور دیا کہ ایسے علاقوں کی نشاندہی کو ترجیحی بنیادوں پر یقینی بنایا جائے جہاں لوگ معاشی مشکلات کا شکار ہو کر دو وقت کی روٹی سے محروم ہیں۔