وزیر اعظم کی سعودی ولی عہد سے ملاقات، ماحولیاتی مسائل پر گفتگو

ریاض: وزیر اعظم عمران خان نے سعودی ولی عہد شہزادہ محمد بن سلمان سے ملاقات کی ہے جس میں پاک سعودی عرب تعلقات اور ماحولیاتی مسائل پر تبادلہ خیال کیا گیا۔

تفصیلات کے مطابق دونوں سربراہانِ مملکت کے مابین ملاقات مڈل ایسٹ گرین انیشیٹو کانفرنس کی سائیڈ لائن پر ہوئی جس میں دونوں ممالک کے مابین دو طرفہ تعاون اور موسمیاتی تبدیلیوں سے متعلق امور پر بات چیت ہوئی۔ 

یہ بھی پڑھیں:

ماحولیاتی مسائل حل کرنے کیلئے  ایک ارب مینگروز لگائیں گے، وزیر اعظم

سعودی عرب کی سلامتی یقینی بنانے کے لیے پاکستان پر عزم ہے،وزیر اعظم

اس موقعے پر وزیراعظم عمران خان نے سعودی عرب کی تعمیر و ترقی کیلئے سعودی فرمانروا کے کردار کو خراج تحسین پیش کرتے ہوئے سعودی عرب کی سماجی و اقتصادی ترقی کے لئے ولی عہد محمد بن سلمان کے ویژن 2030 کو سراہا۔

اس سے قبل وزیر اعظم عمران خان نے دورہ سعودی عرب کے دوران پاکستان سعودی عرب انوسٹمنٹ فورم سے خطاب کرتے ہوئے کہا کہ سعودی عرب نے ہمیشہ ہر مشکل وقت میں پاکستان کا ساتھ دیا اور دونوں ملکوں کے درمیان تاریخی و برادرانہ تعلقات موجود ہیں۔

وزیر اعظم نے کہا کہ سعودی عرب سے پاکستان کے ثقافتی و مذہبی سطح پر گہرے تعلقات ہیں اور سعودی عرب کی سلامتی یقینی بنانے کے لیے پاکستان پر عزم ہے۔ پاکستان میں غیر ملکی سرمایہ کاروں کے لیے وسیع مواقع ہیں۔