ن لیگ کا تحریک عدم اعتمادکیلئے 38 حکومتی ارکان کی حمایت کا دعویٰ

اسلام آباد :پاکستان مسلم لیگ ن نے دعویٰ کیا ہے کہ 38 حکومتی ارکان حکومت کے خلاف تحریک عدم اعتماد کی حمایت کریں گے۔

ذرائع کے مطابق 38 حکومتی ارکان اسمبلی کی فہرست سابق وزیراعظم اور مسلم لیگ ن کے قائد نواز شریف کو بھجوا دی گئی ہے جبکہ مسلم لیگ ن نے 10 پارلیمنٹرینز کو اگلے انتخابات میں پارٹی ٹکٹ دینے کی یقین دہانی بھی کرائی ہے۔

مسلم لیگ ن کے سینئر رہنما نے دعویٰ کیا کہ 16 ارکان قومی اسمبلی ان کے ساتھ ہیں۔مسلم لیگ (ن) کے سینئر رہنما نے یہ بھی دعویٰ کیا کہ ن لیگ نے حکومت کے ہم خیال ارکان کو تین مرحلوں میں تقسیم کیا ہے۔

اس سے قبل گزشتہ روز اپوزیشن جماعتوں نے تحریک عدم اعتماد کے مسودے کو حتمی شکل دی تھی جس پر 80 سے زائد اراکین قومی اسمبلی نے دستخط کیے تھے۔

مزید پڑھیں:سیاسی ٹاکرے کا حتمی مرحلہ، عدم اعتماد سے کون فائدہ اٹھائے گا،نقصان کس کو ہوگا؟

مسودے میں کہا گیا ہے کہ قائد ایوان ارکان کی اکثریت کا اعتماد کھو چکے ہیں۔ملک معاشی بحران کا شکار ہے اور ملک کو اس سے نکالنے کا کوئی روڈ میپ نہیں ہے۔ ملک میں سیاسی عدم استحکام اور غیر یقینی کی صورتحال بھی ہے اور حکومت خارجہ پالیسی کے محاذ پر بھی ناکام ہوچکی ہے۔

ذرائع کا کہنا ہے کہ اپوزیشن نے اسمبلی اجلاس بلانے کے لیے ریکوزیشن بھی تیار کر لی ہے اور اپوزیشن لیڈر شہباز شریف کے چیمبر کو بھی الرٹ کر دیا گیا ہے کیونکہ تحریک عدم اعتماد اور ریکوزیشن کسی بھی وقت جمع کرائی جا سکتی ہے۔