اداروں سے سیاسی مداخلت کا خاتمہ کیا جائے، گورنر سندھ

کراچی:گورنر سندھ عمران اسماعیل کی زیر صدارت گورنر ہاؤس میں اعلیٰ سطحی اجلاس منعقد ہوا۔اجلاس میں وفاقی وزیر توانائی عمر ایوب اسلام آباد سے ویڈیو لنک کے ذریعہ شریک ہوئے جبکہ اس موقع پر اراکین صوبائی اسمبلی حلیم عادل شیخ، پاکستان تحریک انصاف کراچی کے سینئر نائب صدر اور مشیر ساحلی امور محمود مولوی، سعید آفریدی، خواجہ اظہار، نصرت سحر عباسی، اور حیسکو و سیپکو کے حکام بھی موجود تھے۔ اجلاس میں اراکین صوبائی اسمبلی نے اپنے اپنے حلقوں میں ہونے والی لوڈشیڈنگ کی شکایات کیں۔

اراکین کا کہنا تھا کہ ہمارے حلقوں میں بارہ سے پندرہ گھنٹے کی لوڈشیڈنگ کی جا رہی ہے جس سے عوام کو مشکلات کا سامنا کرنا پڑرہا ہے اس وقت صوبہ کے مختلف اضلاع میں پندرہ سال سے بدعنوان افسران کی اجارہ داری ہے جنھیں صوبائی حکومت کی مدد حاصل ہے۔

گورنرسندھ نے کہا کہ یہ افسوس کی بات ہے کہ پورے صوبہ سے بجلی کی عدم فراہمی سے متعلق شکایات موصول ہو رہی ہیں۔گورنرسندھ نے متعلقہ حکام کو ہدایت دیتے ہوئے کہا کہ افسران ان عوامی شکایات کا ہر صورت ازالہ یقینی بنائیں اورمحکمہ میں موجود بدعنوان افسران کے خلاف انکوائری بھی کی جائے ساتھ ساتھ اداروں سے سیاسی مداخلت کا خاتمہ بھی کیا جائے۔

During the meeting, it's been decided that Governor House Sindh will monitor power supply issues across Sindh.

Govt is taking further steps to solve the problems faced by people of Sindh as far as electricity is concerned.2/2 https://t.co/NP7J2vZ0qE

— Mahmood Moulvi (@MoulviMahmood) July 3, 2020

گورنرسندھ نے کہا کہ وفاقی حکومت کے اداروں سے صوبہ کے عوام کو بڑی توقعات ہیں اس لئے اس بات کی کسی صورت بھی اجازت نہیں دی جا سکتی کہ وفاق کے ماتحت اداروں سے عوام کو کسی بھی قسم کی مشکلات کا سامنا کرنا پڑے۔

اجلاس میں وفاقی وزیر عمرایوب نے سیپکو اور حیسکو حکام کو ہدایت کی کہ تمام شکایات کا ازالہ سات دن میں کیا جائے،اس ضمن میں، میں خود جلد سندھ کا دورہ کرونگا اور صوبہ میں شکایات کی مانیٹرنگ گورنر ہاؤس سے کی جائے گی۔

انہوں نے واضح کیا کہ بجلی نظام میں مرمتی کام کے لئے کسی بھی قسم کے کوئی پیسے نہیں لئے جا سکتے ہیں پیسے لینے والوں کے خلاف ایکشن لیا جائے گا اس سلسلہ میں کچھ افسران کی انفرادی طور پر انکوائری کی جا رہی ہے۔