عامر لیاقت حسین کے ورثاء کا پوسٹ مارٹم سے انکار، نمازِ جنازہ آج ہوگی

کراچی: تحریکِ انصاف کے ٹکٹ پر 2018ء میں رکنِ قومی اسمبلی منتخب ہونے والے معروف ٹی وی اینکر عامر لیاقت حسین کے ورثاء نے میت کا پوسٹ مارٹم کرانے سے انکار کردیا ہے جبکہ عامر لیاقت حسین کی نمازِ جنازہ اور تدفین آج کی جائے گی۔

فوٹو شیئرنگ پلیٹ فارم انسٹاگرام پر اپنے پیغام میں رکنِ قومی اسمبلی کی سابق اہلیہ سیّدہ بشریٰ اقبال نے کہا کہ میرے سابقہ شوہر کی نمازِ جنازہ 10 جون کو نمازِ جمعہ کے بعد ادا کی جائے گی۔ 

یہ بھی پڑھیں:

رکنِ قومی اسمبلی عامر لیاقت حسین انتقال کر گئے

انسٹاگرام پیغام کے مطابق عامر لیاقت حسین کی نمازِ جنازہ دن 2 بجے کراچی کے علاقے کلفٹن میں واقع جامع مسجد عبداللہ شاہ غازی رحمۃ اللہ علیہ میں ادا کی جائے گی۔ تدفین مزار کے احاطے میں ہوگی۔

پیغام کے مطابق عامر لیاقت حسین کے دونوں ورثاء احمد عامر اور دُعا عامر نے اپنے والد کا پوسٹ مارٹم کرنے سے انکار کیا ہے۔ مرحوم کو عزت و احترام کے ساتھ آخری آرام گاہ تک لے جایا جائے گا۔ 

 

View this post on Instagram

 

A post shared by Dr Bushra Iqbal (@syedabushraiqbal)

عامر لیاقت حسین کی سابقہ اہلیہ ڈاکٹر بشریٰ اقبال نے عوام سے درخواست کی کہ رکنِ قومی اسمبلی کیلئے دعائے مغفرت کریں۔ انہوں نے خود بھی عامر لیاقت کی بلندئ درجات کیلئے دعا کی۔

خیال رہے کہ اس سے قبل پاکستان تحریکِ انصاف کے ناراض رکنِ قومی اسمبلی و ٹی وی میزبان عامر لیاقت حسین انتقال کر گئے۔ انتقال سے کچھ ہی روز قبل عامر لیاقت نے ملک چھوڑنے کا اعلان کیا تھا۔

گزشتہ روز رکنِ قومی اسمبلی و ٹی وی میزبان عامر لیاقت حسین کے ملازم نے ان کے انتقال کی تصدیق کرتے ہوئے بتایا کہ رات کے وقت عامر لیاقت حسین کو دل میں تکلیف تھی، تاہم انہوں نے علاج کیلئے جانے سے انکار کردیا تھا۔