گوگل نیوز پر ہمیں فالو کریںلاہور: انسداد دہشتگردی عدالت (اے ٹی سی) لاہور نے پاکستان تحریک انصاف (پی ٹی آئی) کے بانی عمران خان کے بھانجے اور علیمہ خان کے بیٹے شیر شاہ کو جناح ہاؤس حملہ کیس میں پانچ روزہ جسمانی ریمانڈ پر پولیس کے حوالے کرنے کا حکم دیا ہے۔
سماعت کے دوران تفتیشی افسر نے عدالت کو بتایا کہ شیر شاہ جناح ہاؤس حملے کے موقع پر موجود تھا جس کی ویڈیو شواہد بھی عدالت میں پیش کیے گئے اور باضابطہ طور پر چلائے گئے۔
پولیس نے عدالت سے استدعا کی کہ ملزم کے فوٹو گرامیٹرک اور پولی گرافک ٹیسٹ کرانے کے لیے 30 روزہ جسمانی ریمانڈ دیا جائے۔
ملزم کے وکیل سلمان اکرم راجہ نے اس درخواست کی مخالفت کرتے ہوئے مؤقف اپنایا کہ واقعے کے 27 ماہ بعد گرفتاری کا کوئی جواز نہیں بنتا۔ انہوں نے کہا کہ اگر یہی طرز عمل جاری رہا تو پورے شہر کو گرفتار کر لیا جائے گا، لہٰذا عدالت کو چاہیے کہ ملزم کو کیس سے بری کرے۔
دلائل سننے کے بعد عدالت نے پولیس کی 30 روزہ جسمانی ریمانڈ کی استدعا مسترد کرتے ہوئے پانچ روزہ جسمانی ریمانڈ منظور کیا اور شیر شاہ کو پولیس کے حوالے کر دیا۔
یاد رہے کہ اس سے قبل علیمہ خان کے دوسرے بیٹے شہر یز خان کو بھی جناح ہاؤس حملہ کیس میں گرفتار کیا گیا تھا۔ انسداد دہشتگردی عدالت کے جج منظر علی گل نے ان کا آٹھ روزہ جسمانی ریمانڈ منظور کیا تھا۔
لاہور پولیس کے ڈی آئی جی انویسٹی گیشن نے اس گرفتاری کی تصدیق کرتے ہوئے کہا تھا کہ شہر یز خان مئی 9 واقعات سے جڑے متعدد مقدمات میں مطلوب تھا۔
سیاسی تجزیہ کاروں کا کہنا ہے کہ عمران خان کے قریبی رشتہ داروں کی گرفتاری مئی 9 کے کیسز میں ہونے والی تفتیش کے نئے مرحلے کی عکاسی کرتی ہے جس پر پی ٹی آئی کی قیادت پہلے ہی تحفظات کا اظہار کر چکی ہے۔
