تحریک انصاف کا لانگ مارچ کی تاریخ بجٹ کے بعد طے کرنے کا فیصلہ

اسلام آباد: پاکستان تحریک انصاف (پی ٹی آئی) نے اتوار کو فیصلہ کیا ہے کہ اسلام آباد کی طرف اگلے مارچ کی تاریخ وفاقی بجٹ کے بعد طے کی جائے گی جب کہ پارٹی کے ایم این ایز اپنے استعفوں کی تصدیق کے لیے اسپیکر قومی اسمبلی کے سامنے پیش نہیں ہوں گے۔

یہ فیصلے چیئرمین عمران خان کی زیر صدارت کور کمیٹی کے اجلاس میں کیے گئے۔

اجلاس نے بجٹ 2022-23 کی وجہ سے فوری لانگ مارچ کا پلان منسوخ کر دیا اور فیصلہ کیا کہ اگلے لانگ مارچ کی تاریخ 15 جون کے بعد طے کی جائے گی۔ تاہم فیصلہ کیا گیا کہ پارٹی ضلعی سطح پر مہنگائی کے خلاف ملک گیر احتجاج کرے گی۔

کور کمیٹی نے چیئرمین عمران خان کی گرفتاری کی صورت میں حکمت عملی کو بھی حتمی شکل دی۔

پارٹی ملک میں نئے انتخابات کی تاریخ کے علاوہ کسی اور بات چیت میں شامل نہیں ہوگی اور اس کے اراکین اسمبلی بھی اپنے استعفوں کی تصدیق کے لیے کل قومی اسمبلی کے اسپیکر کے سامنے پیش نہیں ہوں گے۔

کور کمیٹی کے فیصلوں پر بریفنگ کے لیے میڈیا سے خطاب کرتے ہوئے پی ٹی آئی کے رہنما اور سابق وزیر خارجہ شاہ محمود قریشی نے کہا کہ پارٹی پنجاب اسمبلی کی 20 نشستوں کے ضمنی انتخابات میں بڑھ چڑھ کر حصہ لے گی جو پی ٹی آئی کی ڈی سیٹنگ کے بعد خالی ہوئی تھیں۔

انہوں نے کہا کہ وزیر داخلہ رانا ثناء اللہ عمران خان کو گرفتار کرنے کا ارادہ رکھتے ہیں، انہوں نے مزید کہا کہ اس طرح کے اقدام کا‘انتہائی ردعمل’ہوگا۔

مزید پڑھیں:عمران خان ہیلی کاپٹر کے ذریعے بنی گالہ پہنچ گئے

شاہ محمود قریشی نے خبردار کیا کہ عمران خان کی گرفتاری پرجو یہ سوچ رہے ہیں کہ ہم خاموش رہیں گے وہ غلط سوچ رہے ہیں، سابق وزیر نے بجلی، گیس اور ایندھن کی قیمتوں میں اضافے کے بعد ملک میں مہنگائی کے طوفان کو بھی تنقید کا نشانہ بنایا۔