کراچی میں بڑھتے جرائم، خرم شیر زمان نے وفاق سے مدد طلب کرلی

کراچی: شہر قائد میں بڑھتے ہوئے اسٹریٹ کرائم کے واقعات کے پیش نظر پی ٹی آئی کے پارلیمانی لیڈر سندھ اسمبلی خرم شیر زمان نے کراچی میں امن کیلئے وفاق سے مدد مانگ لی۔

ذرائع کے مطابق کراچی میں بڑھتی ہوئی اسٹریٹ کرائمز کی وارداتوں کے پیش نظر پی ٹی آئی کے پارلیمانی لیڈر سندھ اسمبلی خرم شیر زمان نے وفاقی وزیر داخلہ شیخ رشید کو خط لکھ دیا۔

خط میں کراچی میں راہزنی کی روک تھام کیلئے وفاق سے تعاون کی درخواست کرتے ہوئے کہ کراچی میں اسٹریٹ کرائم کے واقعات حد سے زیادہ تجاوز کرگئے ہیں۔

خرم شیر زمان نے کہا کہ پولیس کے اعداد کے مطابق 2021 میں 80 ہزار سے زائد راہزنی کے کیسز رپورٹ ہوئے، 2020 کے مقابلے میں 2021 میں واقعات میں 27فیصد اضافہ ریکارڈ کیا گیاہے۔

پی ٹی آئی کے پارلیمانی لیڈر نے کہا کہ کیسز تقریبا 97 فیصد موٹر سائیکلیں، موبائل، گاڑیاں چوری اور چھیننے سے متعلق تھے،شہریوں کا سندھ حکومت اور کراچی پولیس سے اعتماد و امید ختم ہو گئی ہے۔

انہوں نے کہا کہ صورتحال کی بہتری کیلئے شہری وزیراعظم اور وفاقی حکومت کی جانب دیکھ رہے ہیں، شہر میں جنگل کا قانون ہے جو شہریوں کیلئے ناقابل برداشت ہوچکا ہے۔

مزید پڑھیں: تحریک عدم اعتماد کی کامیابی کے بعد اپوزیشن شہباز شریف کو وزیراعظم نامزد کرنے پر متفق

خرم شیر زمان نے گزارش کی کہ اس اہم مسئلے پر وفاقی حکومت غور کرے، کراچی کے امن کو قائم رکھنے کیلئے آئین اور قانون کے مطابق اقدامات کیے جائیں۔