گوگل نیوز پر ہمیں فالو کریںکراچی: شہر قائد میں ڈاکوؤں نے پولیس کی چیکنگ سے بچنے کیلئے موٹرسائیکلوں پر بچوں کو بھی ساتھ رکھنا شروع کردیا، ایف بی ایریا میں بچے کو ساتھ بٹھا کر واردات کی ویڈیو سوشل میڈیا پر وائرل ہوگئی۔
ایف بی ایریا پولیس نے چکمہ دینے کے لیے موٹرسائیکلوں پر بچوں کے ساتھ شہریوں کو نشانہ بنانے والے ڈاکوؤں کے ایک گروہ کو گرفتار کرنے کا دعویٰ کیا ہے۔
ایف بی ایریا پولیس نے انکشاف کیا کہ گزشتہ رات زخمی حالت میں گرفتار ایک ملزم نے مجرمانہ سرگرمیاں کرنے کا اعتراف کیا جب کہ اس کے ساتھ موٹر سائیکل پر تین سالہ بچہ بھی تھا۔
ملزم نے انکشاف کیا کہ اسنیپ چیکنگ کے دوران پولیس بچے کی وجہ سے موٹرسائیکل سواروں کو روکنے سے گریز کرتی ہے۔
گرفتار ملزمان کے قبضے سے مختلف مقامات سے شہریوں سے لوٹے گئے متعدد موبائل فونز بھی برآمد ہوئے ہیں۔
قبل ازیں مومن آباد پولیس نے ایک کارروائی کی جس کے نتیجے میں کراچی میں ڈکیتی کی متعدد وارداتوں میں مبینہ طور پر ملوث چار افراد کو گرفتار کیا گیا تھا۔
پولیس ترجمان نے مجرمانہ سرگرمیوں میں ملوث چار افراد کو گرفتار کرکے ان کے قبضے سے تین اسلحہ، ایک موٹر سائیکل اور دیگر سامان برآمد کرنے کا دعویٰ کیا تھا۔
پولیس کے مطابق گرفتار ملزمان نے دوران تفتیش کراچی کے متعدد علاقوں میں ڈکیتیوں کا اعتراف کرلیا ہے۔
